27/07/2026
کوہاٹ: ایس پی ٹریفک شاہ حسن خان کا کوہاٹ پولیس ڈرائیونگ سکول کا دورہ، تربیتی معیار کا جائزہ
کوہاٹ ایس پی ٹریفک شاہ حسن خان نے کوہاٹ پولیس ڈرائیونگ سکول کا تفصیلی دورہ کیا، جہاں انہوں نے ڈرائیونگ سکول میں جاری تربیتی سرگرمیوں، کلاس رومز، ٹریننگ ٹریک، گاڑیوں اور دیگر سہولیات کا معائنہ کیا۔
دورے کے موقع پر ڈرائیونگ سکول کے انچارج نے ایس پی ٹریفک کو تربیتی نظام، نئے ڈرائیورز کو فراہم کی جانے والی عملی اور نظریاتی تعلیم، ٹریفک قوانین سے متعلق آگاہی اور ادارے کی مجموعی کارکردگی پر بریفنگ دی۔
ایس پی ٹریفک شاہ حسن خان نے تربیتی عمل کا بغور جائزہ لیتے ہوئے کہا کہ محفوظ ڈرائیونگ کا فروغ اور شہریوں کو ٹریفک قوانین سے آگاہ کرنا وقت کی اہم ضرورت ہے۔ انہوں نے کہا کہ بہترین تربیت یافتہ ڈرائیور ہی ٹریفک حادثات میں کمی اور محفوظ شاہراہوں کے قیام میں اہم کردار ادا کر سکتے ہیں۔
انہوں نے ڈرائیونگ سکول کے عملے کو ہدایت کی کہ تربیت حاصل کرنے والے ہر امیدوار کو جدید ٹریفک قوانین، روڈ سیفٹی، دفاعی ڈرائیونگ اور ذمہ دارانہ رویوں سے مکمل طور پر آگاہ کیا جائے تاکہ وہ ایک ذمہ دار اور قانون کا احترام کرنے والا ڈرائیور بن سکے۔
ایس پی ٹریفک نے ڈرائیونگ سکول کے انتظامات اور تربیتی معیار پر اطمینان کا اظہار کرتے ہوئے عملے کی کارکردگی کو سراہا اور اس عزم کا اظہار کیا کہ کوہاٹ میں ٹریفک کے نظام کو مزید بہتر بنانے اور شہریوں میں روڈ سیفٹی کے شعور کو فروغ دینے کے لیے ایسے اقدامات کا سلسلہ جاری رکھا جائے گا۔
