27/04/2023
📣Paggamit ng temporary at improvised Licensed Plates, nilinaw ng LTO.
Paggamit ng temporary at improvised licensed plates, nilinaw ng LTO
MARIING ipinaalala ni Land Transportation Office (LTO) Chief Jayart Tugade na ipinagbabawal ng batas ang hindi awtorisadong paggawa o pag-imprenta ng plaka ng sasakyan.
Inilahad ni LTO Chief Tugade ang paglilinaw kaugnay ng napaulat na pinahihintulutan ng LTO ang do-it-yourself o DIY na plaka sa harap ng nalalapit na pagkaubos ng suplay ng plaka.
Giit ni LTO Chief Tugade, malinaw sa batas na bawal ang sariling pag-iimprenta ng mga plaka lalo na kung hindi rin nakasusunod sa pamantayan ng ahensya o specifications partikular sa aspetong panseguridad.
"Ang general rule po ay bawal po mag-print ng sariling plate number. Tanging mga dealer lamang po ang pinapayagang mag-issue ng temporary plate para maiuwi ang mga bagong sasakyan dahil mayroon tayong "no plate, no travel" policy," paliwanag ni Tugade.
Alinsunod sa Memorandum na umiiral na mula nuong 2017, ibinibigay ang temporary licensed plate para sa mga bagong sasakyan at ang mismong dealers na ang gumagawa nito.
Nakasaad sa temporary licensed plates ang conduction sticker number para sa mga motor vehicle (apat na gulong) habang file number sa mga motorsiklo.
Kailangan din na nakasunod sa uri ng materyal na gagamitin, font ng mga titik, at disenyo at layout sa paggawa ng temporary licensed plate.
Samantala, sakaling mawala, manakaw o masira ang plaka ng sasakyan, maaaring gumamit ng improvised licensed plates. Gayunman, kailangan munang i-ulat at kumuha ng awtorisasyon mula sa LTO ang may-ari ng sasakyan para gumamit ng pansamantalang plaka.
Sa paggamit ng improvised licensed plates, ipinapayo ng LTO na lagyan ng katagang LOST PLATE at hindi dapat na kamukha ng orihinal o opisyal na disenyo ng plaka ang gagamitin.
“Kailangan ding dalhin ng may-ari ng sasakyan ang kanyang Official Receipt at Certificate of Registration upang sakaling masita ng mga law enforcer sa posibleng paglabag sa batas-trapiko ay mayruong maipapakitang dokumento,” pahayag ni LTO Chief Tugade.
“Itong paggawa ng improvised license plates ay masasabing exception sa general rule na bawal gumawa ng sariling plaka pero dapat ay nasusunod ang panuntunan ng LTO hinggil dito,” diin pa ng LTO Chief.
Ang sinumang gagamit ng improvised na plaka ng walang kaukulang awtorisasyon mula sa LTO ay paglabag sa Section II (e) ng Joint Administrative Order No. 2014-01 at may katapat na P5,000.00 multa at pagkumpiska sa ginawang improvised na plaka.
"Kung 'yung plaka po ninyo ay ninakaw o may sira na dahil sa katagalan ay huhulihin po kayo. Para po maiwasan ito ay kinakailangan lang pumunta sa opisina ng LTO para magpagawa ng duplicate plate at para na rin ma-apply ng authorization to use improvised plate," sabi pa ni Tugade.
🇵🇭
