21/02/2019
بمناسبة مرور 20 عام على اطلاق الجيل الاول من فوكس قررات فورد باش تطلق الجيل الرابع، تم الكشف على فوكس 2019 بمعرض لندن عام 2018 ومزال موصل للأسواق المغربية، هاد الطوموبيل لي كتحمل العلامة التجارية الأمريكية كي تم الانتاج والتطوير ديالها في آلمانية وهاد السياسة كتبعها شركات أخرى من ضمنهم كيا وهيونداي (التطوير فقط). فوكس حققات مبيعات مهمة لفورد بحيث أنها باعة أكثر من 16 مليون طوموبيل في ثلاثة ديال الأجيال.
جاء في تصريح من شركة فورد على أن فوكس صفحة بيضاء يعني أنها تغييرات بالكامل. واش فعلا لحظتو هاد التغيير مابين الجيل الثالث والجيل الرابع؟
من أهم التغييرات لي شهداتها فوكس هو المصابيح النهارية لي ولات "LED" وصادم أمامي (Bumper) جديد وغطاء المحرك بخطوط انسيابية كي عطي الطوموبيل شكل رياضي، أما من الخلف تم تغيير شكل المصابيح والصادم الخلفي. ابعاد الطوموبيل تغييرو إلا أن سعة الكوفر بقات بنفس سعة الجيل ليفات وهذا راجع لمقصورة الداخلية لي صبحات أوسع من القدام واللور. تزودات الطوموبيل بشاشة متعددة الوسائط كيتراوح حجمها مابين 6,5 إلى 8 بوصة كتدعم كل من Android Auto و Appel Carplay ولكن عدادات السرعة مازال عادية (physical instrument) وهذا أمر سلبي، من الملاحظات ليغادي تثير الإنتباه ديالك في التابلو هو عدد الأزرار ولاو أقل من لي كانو عليه في الأجيال السابقة وبسبابهم تلقاو انتقادات. وسائل الأمان المتطورة في الطوموبيل ستطعات توصل إلى المستوى الثاني من أصل خمسة مستويات في القيادة الذاتية وهذا كيعطيها أفضلية على المنافسين.
كتوفر فوكس على ثلاثة ديال الماتر ديزل وعلبة سرعة عادية وأوتوماتيك من 8 سرعات، الموتور الأساسي بسعة 1.5 لتر كيولد 95 حصان والموتور الثاني بنفس السعة ولكن القوة الحصانية أكثر بحيث كيولد 120 حصان، أما الموتور الثالث بسعة 2.0 لتر وفيه 150 حصان، كتوفر كذالك على ماتر اصنص ولكن ما موجهنش للأسواق المغربية.
كيما كنعرفو في فئة "hatchback" المنافسة قوية، وفوكس ضمن هاد الفئة ،أبرز المنافسين في سعر هما رونو مغان وبوجو 308 مع أنهم كيقدمو جودة جيدة إلا أنهم ماغديش يوصلو لجودة لكتقدمها كل من سيات ليون وفولكس فاجن جولف ولكن سعرهم مرتافع شوية.
الطوموبيل مزال مدخلات للمغرب يعني أن ثمنها ممعروف وكذالك الموصفات لكيقدمها وكيل فورد في المغرب كتختالف على الموصفات لكيقدموها الوكلاء في الدول الأخرى، فاش يتوفرو عندي المعلومات غادي نشركهم معاكم على الصفحة.
