24/03/2025
Auto Body Industry ✅ Vs ලංකාවෙ වාහන 'ප්ලේන්ට්' කිරිල්ල❌
කාලයක තිස්සේ මගේ ඔලුවේ තිබ්බ දෙයක් තමයි මගේ වෘත්තීයට අදාළ සහ මම දවසගානේ ඉගෙනගන්න දේවල් හෑල්ලක් විදියට ලියලා තියන්න ඕනි කියලා. මට තිබුන වැඩ සහ මගේ කම්මැලිකම නිසා මට ඒ දේ මඟහැරුනා. Youtube එකෙන් යම්දෙයක් කළත් තවත් දෙයක් කරන්න ඕනි කියන තැනින් මම මේ හෑල්ල ලියන්න පටන්ගන්නවා. මම උත්සහ කරනවා නිතරම මේ හෑල්ල ලියන්න. මට බෑ කියලා හිතුනත් මම මොනවා හරි ලියනවට ආස පුද්ගලයා නිසා මම මේක ලියනවා. හරි දැන් කතාවට බහිමු.
මගේ වෘත්තීයට අදාළ වෙන්නේ Auto Body Industry එක. ලංකාවේ බහුතරයක් එහෙම කිව්වට දන්නේ නෑ කියලා මම දන්නවා. සරළව කිව්වොත් වාහන පේන්ට් කිරීම. ගොඩදෙනෙක් කියන්නේ ප්ලේන්ට් කරනවා කියලා. ඒක වැරදි වචනයක්. නමුත් කරන්න දෙයක් නෑ, ඒක තමයි මේ වෘත්තීයට අපේ රටේ දීලා තියන තැන. නොදැනුවත්කම සහ වෘත්තීයට අදාළ ගරුත්වය විනාස කරගැනීමේ අතුරු ප්රතිඵල. ඒ නිසාම තමයි මේ පිළිබඳව කිසිදෙයක් නොදන්න අයගෙන් පවා එක එක හිත රිදෙන කතා, බැණුම්, ගැරහීම් අහන්න වෙලා තියන්නේ. කොච්චර හොඳ වාහනයක්, bike එකක් වුණත් ඒකෙ පිට පෙනුම තමයි මුලින්ම පෙන්නේ. එක හරිම ලස්සනයි කියන දේ ඔළුවට එන්නේ. හැබැයි කියෙන් කීදෙනාද දන්නේ ඒ තැනට ගේන්න auto body industry එකට අදාළ මිනිස්සු කීදෙනෙක් ඒකට මහන්සි වෙනවද කියලා. සමහර වෙලාවට මටත් මේ industry එක එපා වෙන තරමට හිත් රිදවීම් එනවා. වැඩේ කරන්නේ කවුරුවත් නමුත් credits යන්නේ වෙන කාටවත්. මට අනුව ඒක හරිම කැත අසාදාරණ වැඩක්. මම මේ ලියන කාලය තුළදිත් මගේ පුද්ගලික අත්දැකීමක් එක්ක අවුල් වෙලා ඉන්න මොහොතක්. මම හිතන්නේ මේක මම ඉන්න industry එකේ කෙනෙක් කියෙව්වොත් ඒ කාට හරි එහෙම අත්දැකීම් ඇති. කරන්න දෙයක් නෑ මිත්රයා විනාස කරපු දේවල් නිවැරදි කිරීමත් අපේම වැඩක්. Doctor, proctor, accountant ඉදල පාරේ කුණු අදින කෙනා කරන්නෙත් වෘත්තියක්. හැබැයි නිසි වටිනාකමක් ලැබෙන්න නම් ඒ ඒ වෘත්තීන්ට අදාළව ප්රවීණයන් වෙන්න අවශ්යයි. ඒක ලැබෙන්නේ අත්දැකීම් සහ දවසගානේ update වීමෙන්. රස්සාවක් නැතිකමට, එදා වේලට කියක් හරි හොයාගන්න වගේ තැනකින් මේ industry එකට අවොත් වෙන්නෙ ඔන්න ඔය ටික. ඒක කමක් නෑ, ඒක ඒ අයගේ අයිතියක්. නමුත් ඒකෙන් වෙන්නේ passion එකක් විදියට, ජීවිතේ කොටසක් විදියට මේකත් එක්ක ජීවත් වෙන මිනිස්සුන්ට කරන වැරද්දක්.
ලංකාව මේ industry එකෙන් ගත්තොත් අවුරුදු 15ක් විතර පිටිපස්සෙන් ඉන්නේ. ඒකට හේතු ගොඩක් තියනවා. ප්රධානම සාධකය ආර්ථිකය. ඒ නිසා අපේ අය බලනවා තමන්ට අවශ්ය දේ වෙනුවට තියන දෙයින් සැනසෙන්න. මම ඔයාලගෙන් ඉල්ලන්නේ අන්න ඒ දේට ඉඩ දෙන්න එපා. මගේ එක්ක කතා කරන, msg කරන ගොඩක් අය කියන දෙයක් තමයි "අලුත් tools, material කොහෙන්ද ගන්නේ, අපේ පැත්තේ කඩවල නෑනේ. මම ඇහුවා, එයාලා ගාව ඒක නෑ කිව්වා, ඒ වෙනුවට එයාලා වෙන එකක් දුන්නා" වගේ දේවල්. මට කියන්නේ ඔයාලා කවුරුත් දැකලා ඇති "එකෙක් තාරාවෙක්, අනිකා පාත්තයෙක්" කියන ad එක. බලලා නැත්නම් බලන්න. මම කියනදේ තෙරෙයි. විකුණන අයට ඕනෙ ලාභය වැඩිම දේ විකුණන්න. ඒක හරිම සාදාරණයි. හැබැයි අපිට අවශ්ය දේට ඉල්ලුම වැඩි වුනොත් මම හිතන්නේ නෑ එයාල ඒක ගැන දෙපාරක් හිතයි කියලා.
මම දන්නවා හැමෝටම කෝටි ගණන්වලින් සල්ලි නෑ අංගසම්පූර්ණ workshop එකක් දාන්න. මටත් නෑ. මේ ආර්ථික යුද්ධයත් එක්ක හරි අමාරුයි. හැමෝටම sponsorලත් නෑ,ආයෝජනය කරන්න අයත් නෑ ඇත්ත තමයි. එහෙම නැති හැමෝටම තියන ප්රශ්නය මොකක්ද? ලොකු ලොකු තැන් වලදි එයාල කියන ගාණට වැඩ කරන්න එන අය වැඩ කරනවා, අපේ තැන් වලට අවාහම නහයෙන් අඩනවා, ඊට පස්සේ මොනවා හරි පොඩි දෙයක් වුණාම කතා කෝටියක් කියනවා. වැරද්දක් වෙන්න බෑ ඒකට මම 100% එකඟයි. නමුත් අපිට පාලනය කරන්න බැරි සාධක තියනව. උදාහරණයක් විදියට කාලගුණය. වැස්ස කියන්නේ කොච්චර ආදරණීය, වැදගත් දෙයක් වුණත් මේ industry එකට ද්රෝහියෙක් කියන්න අපි හැමෝම දන්නවා. ඔයාල හිතනවද ඒක වාහන පදින අය දන්නේ නෑ කියලා. එයාලා ඒක දන්නවා හැබැයි අපිම අපේ වෘත්තීය ගරුත්වය නැති කරගෙන තියන නිසා එයාලා ආසයි චුට්ටක් පොර වෙන්න. ඒක කමක් නෑ ඒකත් එයාලගේ අයිතියනේ, හැබැයි තමන්ට බැරි වැඩක් වෙනකෙනෙක් කරනවානම් තත්ත්වය, තරාතිරම පැත්තකින් තියලා ඒකට ගරුකරන්න ඉගෙනගන්න පුළුවන් නම් ඒක නියම gentleman කෙනෙක්ගෙ ගතියක්.
තව දෙයක් තියනවා, අපි වැඩකරන තැන තියන් ඉන්න විදිය(මම පිළිවල ගැන කතා කරන්නේ නෑ, මොකද තමන්ට පහසු විදියටනේ ඒක තීරණය වෙන්නේ. මම මෙතනින් අදහස් කරන්නේ customer කෙනෙක්ට අපේ work shop එක, working area එක පේන විදිය ගැන), අපි අඳින ඇඳුම් ඒ දේවල්. පරණ වුනාට කමක් නෑ, ඇඳුම් 3-4ක් තියාගන්න. Shoes set 1-2ක්, socks set 2-3ක් තියාගන්න. දවසට අඳින ඇඳුම දවස අවසානයේ හෝදලා දාන්න. මේවා හරි සරල දේවල්. තමන්ගේ පිරිසිදුකම ගැන හිතන්න. මේ industry එකේ ඉන්න කොල්ලෝ කෙල්ලෝ ලස්සනට fashion කරන්න. ලස්සන hairstyles කරන්න. වැඩවල quality එක වගේම තමන්ගේ රූපයේ quality එකත් හිතන්න. මම මෙතනදී අමුතුවෙන් කියන්න යන්නේ නෑ වැඩවල quality එක ගැන. ඒක තමයි මූලිකම දේ, ඒක නැතුව වෙන කිසිමදෙයක් කරලා වැඩකුත් නෑ, තිබිලා වැඩකුත් නෑ. අතපසුවීමක්, වැරද්දක් නොවෙන්න වගබලාගන්න සහ වුණොත් ඒක පිළිගෙන නැවත කරලා දෙන්න. එහෙමත් කරන්න සූදානම් වෙනකොට එතනින් එහා මොනවාහරි දෙයක් වාහනයේ හිමිකරු කරනවානම් හෝ කියනවානම් හෝ හිත හදාගන්න මිත්රයා, ඒක මනුෂ්යත්වයේ සහ මහත්මාකමේ ප්රශ්නයක්.
අදට ඇති කියලා හිතනවා. තව කියන්න ගොඩක් දේවල් තියනවා. ඉස්සරහට හම්බවෙමු. මේ ලියන මොහොතෙත් මට miss වුණ msg, calls තියනවා. වැඩකරන විදිය ගැන අහපු, දේවල් අහගෙන වැඩ කරලා ඒවා හරිගිහින් මට ස්තූති කරපු දේවල්. මොකුත් හිතන්න එපා මන් වෙලාවක් හම්බුන ගමන් reply කරන්නම්. මොනයම් හෝ දෙයක් දැනගන්න අවශ්ය කෙනෙක්ට අනිවාර්යයෙන්ම reply කරලා ඇති.
එකක් මතක තියාගන්න, අපිට අවශ්ය දේ අපිම කරගන්න ඕනී. අමාරුයි තමයි ,හැබැයි අත්හරින්නේ නැතුව passion එකක් වෙනුවෙන් වැඩ කරන්න. මොකද passion එකයි profession එකයි එකක් වුණාම ඒක වෙනම එකක්!
✍🏻 ලෝචන - Gas Monkey Customs SL
