17/06/2026
මෙසී...........................................
වත්මන් ලෝක ශූර ආජන්ටිනාව අද නිල වශයෙන් තමන්ගේ 2026 පාපන්දු ලෝක කුසලාන ගමන ආරම්භ කරමින් පළමු තරගයට ක්‍රීඩා කළා. ඔවුන්ගේ ප්‍රතිවාදීන් බවට පත් වන්නේ ඇල්ජිරියානුවන්.
ලෝක කුසලානයට කලින් ඇල්ජීරියාව නෙදර්ලන්තය පරාජය කළා. බොලිවියාව ගෝල 4-0 ක් විදිහට පරාජය කළා. මේ නිසාම තරගයට කලින් ඇල්ජීරියානු ක්‍රීඩකයන් ආජන්ටිනාව පරාජය කරන්න පුළුවන් කියලා වහසි බස් දෙඩුවා.
හැබැයි තරගය තුළ ඔවුන්ට එක ක්‍රීඩකයෙක් අමතක වුණා. ඒ තමයි වයස අවුරුදු 39 කට ආසන්න වුණත් තාමත් ආජන්ටිනාවේ ඉන්නේ ලියොනල් මෙසී කියන එක.
මෙසී මේ තරගයේ ආජන්ටිනාව ලබාගත් ගෝල 3 ම හිමිකරුවා බවට පත් වුණා.
මේ ගෝල තුනෙන් දෙකක් මෙසී වාර්තා කරන්නේ දඬුවම් පහර සීමාවෙනුත් පිටත කලාපයේ සිටිමින්. ඒ විතරක් නෙමෙ‍යි ඔහු අද වාර්තා ගණනාවක හිමිකරුවෙක් බවට පත් වුණා.
පළමු වාර්තාව තමයි පාපන්දු ලෝක කුසලාන ඉතිහාසයේ සම වැඩිම ගෝල ලාභියා වෙන්නට සමත් වීම. ඔහු අද තරගයට එද්දී පාපන්දු ලෝක කුසලාන වල ගෝල 13 ක් ලබාගෙන හිටියා.
ඔහුට ඉදිරියෙන් කිලියන් ම්බප්පේ ගෝල 14 ක්, රොනාල්ඩෝ නසාරියෝ ගෝල 15 ක් සහ මිරස්ලොව් ක්ලෝස් ගෝල 16 ක් ලබා සිටියා.
දැන් ලියොනල් මෙසී ජර්මනියේ මිරස්ලොව් ක්ලෝස් සමග සම වෙමින් ගෝල 16 ක් ලබාගෙන සිටිනවා.
මෙසීගේ ලෝක කුසලාන පාපන්දු දිවියේ තිබෙන එකම අඩුපාඩුව විදිහට ප්‍රේක්ෂකයන් නම් කළේ ඔහුට ලෝක කුසලානයක ගෝල ත්‍රිත්වයක් නොතිබීම. හැබැයි අද ඒකත් ඔහු සම්පූර්ණ කළා.
මේ 2026 පාපන්දු ලෝක කුසලානයේ පළමු ගෝල ත්‍රිත්වය, ඒ වගේම මෙසී ඉතිහාසගත වෙන්නේ පාපන්දු ලෝක කුසලාන ඉතිහාසයේ ගෝල ත්‍රිත්වයක් වාර්තා කළ වයස්ගතම ක්‍රීඩකයා විදිහට. මෙසීගේ දැන් වයස අවුරුදු 38 දින 357 යි. ඔහු බිඳ දමන්නේ 2018 ක්‍රිස්ටියානෝ රොනාල්ඩෝ ලබාගත්ත ගෝල ත්‍රිත්වයේ වාර්තාව.
ඒ වගේම පාපන්දු ලෝක කුසලාන 6 ක් ක්‍රීඩා කරපු පළමු ක්‍රීඩකයා විදිහටත් අද ඔහු වාර්තා පොත් අතරට එකතු වුණා.
ලියොනල් මෙසී ඇතුළු ආජන්ටිනාව 2026 පාපන්දු ලෝක කුසලානයම ආරම්භ කරන්නේ ඉතාම වටිනා සහ ඉතාම ප්‍රභල ජයග්‍රහණයක් එක්ක. ඔවුන්ට මෙතනින් එහාට දැන් තවත් සෑහෙන අභියෝගයන් ඉතිරි වෙලා තියෙනවා. හැබැයි 2022 වගේ අමිහිරි ආරම්භයක් ඔවුන් ලබා ගත්තේ නෑ.
තවමත් ආජන්ටිනා කණ්ඩායමේ හදවත වෙන්නේ ලියොනල් මෙසී. ඔහු තවමත් ආජන්ටිනාව වෙනුවෙන් තමන් උපරිමය දෙන්න සූදානම් කියලා පෙන්වමින් ඉන්නවා.
මේ ජයග්‍රහණයත් එක්ක මෙසී ඇතුළු ආජන්ටිනාව ලෝක කුසලානයේ අනිත් කණ්ඩායම් වලට ලබා දෙන්නේ මොන වගේ පණිවුඩයක් කියලද හිතෙන්නේ?
