19/12/2025
කවුද මේ ලැන්ඩෝ නොරිස්?
2025 ෆෝමියුලා 1 ලෝක ශූරයා බවට පත් වුණේ මහා බ්රිතාන්යයේ ලැන්ඩෝ නොරිස්. ඔහු ෆෝමියුලා 1 ධාවන පථයේදී නම් මැක්ලරන් කණ්ඩායමේ ධාවකයෙක් විදිහට කටයුතු කළා.
ලැන්ඩෝ සම්බන්ධයෙන් සටහනක් තියන්න හිටියත් මට හරිහැටි වෙලාවක් ලැබුණේ නෑ. දැන් තමයි එහෙම වෙලාවක් ලැබුණේ. ඉතින් බලමු පළමු වතාවට ලෝක ශූරයා බවට පත් වුණ ලැන්ඩෝ නොරිස් කියන්නේ කවුද කියලා.
ලැන්ඩෝ කියන්නේ අපි ගොඩක් වෙලාවට කියවන දකින බොහොම අමාරු පරිසරයක ඉඳලා, පොඩි කාලේ සෑහෙන ලොකු ජීවන අරගලයක නිරත වෙලා ඉදිරියට ආපු චරිතයක් නෙමෙයි. සිංහලෙන් කියනවා නම් ලැන්ඩෝ නොරිස් උපත ලැබුවේ රත්තරන් හැන්ද කටේ තියාගෙන.
1999 නොවැම්බර් මස 13 වෙනිදා මහා බ්රිතාන්යය ජාතික පියෙක්ට සහ බෙල්ජියම් ජාතික මවකට දාව ඔහු බ්රිස්ටල් වලදී උපත ලැබුවා. ඔහුගේ පියා ඇඩම් නොරිස් කියන්නේ හාග්රේව්ස් ලෑන්ස්ඩවුන් සමාගමේ සම හිමිකරුවා. පවුම් මිලියන 200 කට අධික වත්කම් හිමි කෝටිපති ව්යාපාරිකයෙක්.
මේ හින්දම ආර්ථික පැත්තෙන් නම් ලැන්ඩෝ නොරිස්ට කුඩා කාලයේ කිසිම ප්රශ්නයක් තිබුණේ නෑ. සාමාන්යයෙන් ෆෝමියුලා 1 ඇතුළු මෝටර් රථ ධාවන තරග හැඳින්වෙන්නේ ධනවතුන්ගේ ක්රීඩාවක් විදිහට. මොකද ඒ ක්රීඩාවේ නිරත වෙන්න නම් සෑහෙන මුදලක් අවශ්ය වෙනවා.
අවුරුදු 8 ක තරම් කුඩා වයසකින් කාටින් වලට ලැන්ඩෝ නොරිස් පිවිසෙන්නේ අශ්ව රේස් පැදීම, මෝටර් බයිසිකල් පැදීම වගේ විනෝදාංශ ක්රීඩා වල නිරත වීමෙන් පස්සේ. ලැන්ඩෝ වෙනුවෙන් කාටින් වලට වියදම් කරන එකත් ඔහුගේ පවුලට කිසිම ප්රශ්නයක් වුණේ නෑ.
සත්ය වශයෙන්ම ලැන්ඩෝ නොරිස් මෝටර් රථ ධාවන අංශයට උපතින්ම හපන්කම් දැක්වූවා. ඔහු සහභාගී වුණ පළමු ජාතික මට්ටමේ තරගයේදීම Pole Position එක ජය ගත්තා. CIK-FIA යුරෝපීය ශූරයා බවට පත් වුණා. ඊට පස්සේ ඔහු CIK-FIA ලෝක ශූරයා වෙන්නේ මේ කැටගරි එකේ ලෝක ශූරයා බවට පත් වූ ලාබාලතමයා බවට වාර්තා පොත් අතරට එක් වෙමින්.
2014 Ginetta Junior Championship එකේ දක්වපු දක්ෂතා නිසාම ලැන්ඩෝට 2015 දී F4 පදින්න අවස්ථාව ලැබුණා. තමන්ගේ මංගල F4 අත්දැකීමේදීම බ්රිතාන්යය F4 ශූරයා වෙමින් ඔහු 2015 දී F3 දක්වා උසස්වීම් ලබනවා.
2016 සහ 2017 කියන්නේ ලැන්ඩෝ නොරිස්ගේ ධාවන තරග දිවියේ බොහොම වැදගත් වර්ෂ දෙකක්. 2016 දී විතරක් ඔහු Toyota Racing Series, Formula Renault NEC සහ Formula Renault Eurocup ශූරතාවය දිනුවා. 2017 දී FIA F3 යුරෝපීය ශූරතාවය දිනා ගත්තා.
මේ දස්කම් ඔහුට F2 දක්වා උසස්වීම් ලබා දුන්නා. ඒ වගේම තමයි 2017 දී නොරිස්ගේ දක්ෂතා දකින මැක්ලරන් කණ්ඩායම තමන්ගේ යොවුන් ධාවක ව්යාපෘතියටත් ඔහුව සම්බන්ධ කර ගත්තා. 2018 දී F2 ශූරතාවයේ ඔහු ජෝර්ජ් රසල් ට දෙවනි වෙමින් අනුශූරයා බවට පත් වුණා.
මේ දස්කම් නිසාම 2019 වර්ෂයේදී මැක්ලරන් ෆෝමියුලා 1 කන්ඩායමේ සීට් එකක් වෙන්කර ගන්න ලැන්ඩෝ නොරිස්ට පුළුවන් වෙනවා. ඒක තමයි ඔහුගේ ජීවිතයේ හැරවුම් ලක්ෂ්යය සහ ජීවිතය වෙනස් කරපු සන්ධිස්ථානය වුණේ.
ෆෝමියුලා 1 ඉතිහාසයේ බිහිවුණ අති විශිෂ්ටතම කණ්ඩායමක් විදිහට නම් දරලා හිටියත් ලැන්ඩෝ නොරිස් ධාවනයට එකතු වෙන කාලයේ නම් මැක්ලරන් ගත කළේ හොඳ සමයක් නෙමෙයි. ඔවුන් සෑහෙන පසු බෑමකට ලක්වුණ කණ්ඩායමක් වෙලා හිටියා.
තමන්ගේ පළමු ෆෝමියුලා 1 තරගයේ 12 වන ස්ථානය දිනාගත්තත් දෙවන තරගයේම 6 වන ස්ථානය දිනා ගනිමින් ලකුණු ලබා ගන්නට ලැන්ඩෝ සමත් වුණා. නමුත් 2019 තමන්ගේ මංගල අවුරුද්ද අවසන් ඔහු කරන්නේ කිසිම පෝඩියම් එකක් නැතුව. සමස්ථ ලෝක ශූරතා ලකුණු සටහනේ 11 වෙනියා විදිහට.
2020 ෆෝමියුලා 1 ලෝක ශූරතාවයේ පළමු තරගයේදීම 3 වෙනි ස්ථානය දිනාගත් ලැන්ඩෝ නොරිස් තම ෆෝමියුලා 1 දිවියේ මංගල පෝඩියම් එක ලබා ගත්තා. 2020 දී එම පෝඩියම් එකත් සමග ඔහුට ලෝක ශූරතාවයේ හිමි වුණේ 9 වන ස්ථානය.
2021 දී පෝඩියම් 4 ක් එක්ක ලෝක ශූරතාවයේ 6 වන ස්ථානය, 2022 දී එක පෝඩියම් එකක් සමග ලෝක ශූරතාවයේ 7 වෙනි ස්ථානය සහ 2023 දී පෝඩියම් 7 ක් සමග ලෝක ශූරතාවයේ 6 වෙනියා වෙන්න ඔහුට හැකියාව ලැබුණා.
2024 වෙනකනුත් ලැන්ඩෝ නොරිස් ෆෝමියුලා 1 තරගයක් ජයග්රහණය කරලා තිබුණේ නෑ. මේ කාලය වෙද්දී මැක්ලරන් කණ්ඩායම නැවත හොඳ මෝටර් රථයක් නිර්මාණය කරමින් හිස ඔසවන්න පටන් ගත්තා. කාලයක් තිස්සේ කණ්ඩායමේ බර ඇදපු ලැන්ඩෝ නොරිස්ටත් ඒක හොඳ සමයක් වුණා.
2024 මයාමි අදියර තමයි ලැන්ඩෝ නොරිස්ගේ මංගල ෆෝමියුලා 1 තරග ජයග්රහණය සටහන් කළේ. තරග 100 කට වැඩි ගණනක් ධාවනය කිරීමෙන් පස්සේ ඔහු මේ ජයග්රහණය ලබා ගත්තා. මෙතෙක් ධාවනය කළ හොඳම තරගවාරය සටහන් කරමින් ජයග්රහණයන් 4 ක් සහ පෝඩියම් 8 ක් ලැන්ඩෝ 2024 දී වාර්තා කළා.
ඒ වගේම 1998 ට පස්සේ මැක්ලරන් කණ්ඩායමට ෆෝමියුලා 1 කණ්ඩායම් ශූරතාවය ලබා දෙන්න ලැන්ඩෝ නොරිස් සහ ඔස්කාර් පියැස්ට්රි කටයුතු කළා. නොරිස් මැක්ස් වර්ස්ටාපන්ට පමණක් දෙවනි වෙමින් 2024 ෆෝමියුලා 1 ලෝක අනුශූරයා බවට පත් වුණා.
2025 ඔහු ආරම්භ කළේ තමන්ගේ අවුරුද්ද විදිහට. නැගීම් බැසීම් සාර්ථකවීම් අසාර්ථකවීම් මධ්යයේ ඔහු ගමන් කළා. අවසානයේ අතිශය තියුණු ලෝක ශූරතා සටනකින් අනතුරුව මැක්ස් වර්ස්ටාපන්ව ලකුණු 2 කින් අභිබවා යමින් ලැන්ඩෝ නොරිස් ෆෝමියුලා 1 ලෝක ශූරයා බවට පත් වුණා.
2025 දී ඔහු තරග ජයග්රහණයන් 7 ක්, පෝඩියම් 11 ක් වාර්තා කළා. සමස්ථ ලෝක ශූරතා ලකුණු 423 ක් ලැන්ඩෝ නොරිස්ගේ නම ඉදිරියේ සටහන් වුණා. 2008 වර්ෂයෙන් අනතුරුව පළමු වතාවට තමයි මැක්ලරන් ලෝක ශූරයෙක් බිහි වෙන්නේ. ඒ විතරක් නෙමෙයි ඔවුන් පිට පිටම දෙවන වතාවටත් කණ්ඩායම් ලෝක ශූරතාවය දිනා ගත්තා.
ඔබට පෙනෙනවා ඇති ඔහු වසරින් වසර ක්රම ක්රමයෙන් තමන්ගේ දක්ෂතාවය අත්දැකීම් එක්ක වැඩි කරගනිමින් ලෝක ශූරයා බවට පත් වූ ආකාරය. ලැන්ඩෝ කියන්නේ ආර්ථික ප්රශ්න නොතිබුණ ධනපතියෙක් බව ඇත්ත. නමුත් සල්ලි වලට ලෝක ශූරතාවයක් මිලට ගන්න බෑ.
ඒ වෙනුවෙන් අසීමිත කැපවීමක් සහ අධිෂ්ඨානයක් තිබිය යුතුයි. ඔහු ඒ දේ අකුරටම කළා. මේ නිසාම ලැන්ඩෝ නොරිස් කියන්නේ වත්මන් ලෝකයේ වඩාත් තරගකාරීම මෝටර් රථ ධාවනයේ ලෝක ශූරයා.
මේ වෙද්දී 26 හැවිරිදි ලැන්ඩෝ නොරිස් ෆෝමියුලා 1 තරග 152 ක් ධාවනය කරලා ජයග්රහණයන් 11 ක් සහ පෝඩියම් 44 ක් වාර්තා කරපු ධාවකයෙක්. ඒ වගේම ඔහු Pole Position 16 ක් දිනලා තියෙනවා.
මීළඟ අවුරුද්දේ ෆෝමියුලා 1 වල ගොඩක් දේවල් වෙනස් වෙන්න නියමිතයි. මෝටර් රථයේ හැඩයේ ඉඳලා ගොඩක් දේවල්. මේ නිසා ඊළඟ අවුරුද්දේ ලෝක ශූරයා වන මෝටර් රථය සහ ධාවකයා විදිහට ඉදිරියෙන්ම ඉන්නේ කවුද කියලා අපිට දැන්ම අනාවැකි කියන්න නම් අමාරුයි.
ඒත් ලෝක ෆෝමියුලා 1 ඉතිහාසයේ 35 වෙනි ලෝක ශූරයා ලැන්ඩෝ නොරිස් කියන එක නම් ටක්කෙටම කියන්න පුළුවන්!
