07/01/2026
වාහනේ AC පාවිච්චි කරනවා නම් කවදාවත් මේ වැරදි 10 කරන්න එපා!
ගොඩක් අය හිතන්නේ AC එක කියන්නේ ගෙදර තියෙන ෆෑන් එකක් වගේ දෙයක් කියලා. හැබැයි වාහනයක AC පද්ධතිය කියන්නේ එන්ජිමේ ශක්තියෙන් දුවන සංකීර්ණ රසායනික ක්රියාවලියක්.
නිකම්ම නිකං හුළං දෙන මැෂින් එකක් නෙවෙයි. ඒක වැරදියට පාවිච්චි කළොත් ඔයාගේ පෙට්රල් ටික විතරක් නෙවෙයි, වාහනයේ එන්ජිම වගේම ඔයාගේ වටිනා සෞඛ්යයත් විනාශ වෙන්න පුළුවන්. අද විශ්ම ලෝකයෙන් අපි කතා කරන්නේ වාහන වල AC පාවිච්චි කරනකොට කවදාවත් කරන්න හොද නැති වැරදි 10ක් ගැනයි.
අංක 01 - අව්වේ තිබ්බ වාහනයකට නැග්ග ගමන්ම වීදුරු වහලා AC එක දැමීම
රස්නේ දවසක අව්වේ තිබ්බ වාහනයකට නැගපු ගමන් ගොඩක් දෙනා හිතන්නේ, වීදුරු වහලා AC එක Full දැම්මම ඉක්මනින් සීතල වෙයි කියලා, හැබැයි ඇත්තටම ඒකෙන් වෙන්නේ ඔබේ සෞඛ්යයට ලොකු අනතුරක් කරගන්න එකයි. මේක වෙන්නේ මෙහෙමයි. වාහනයක ඇතුළත Dashboard එක, සීට් බෙල්ට්, සහ අනෙකුත් ප්ලාස්ටික් කොටස් නිපදවීමේදී බෙන්සීන් (Benzene) වැනි රසායනික ද්රව්ය පාවිච්චි කරනවා. වාහනය අව්වේ තියෙනකොට ඒ ඇතුළත උෂ්ණත්වය 60°C - 70°C දක්වා ඉහළ යනවා. මෙන්න මේ අධික රස්නය නිසා ප්ලාස්ටික් වලින් අර විස වායු වාෂ්ප වෙලා වාහනය ඇතුළේ පිරෙනවා. බෙන්සීන් කියන්නේ පිළිකා ඇති කිරීමට (Carcinogen) හේතු විය හැකි, අක්මාවට සහ වකුගඩු වලට හානි කරන විස වායුවක්.
එතකොට කොහොමද අපි වාහනේ ඉක්මණින් සිසිල් කර ගන්නේ ? මම රහස් ක්රමයක් කියන්නම්. වාහනයේ රියදුරු ඔයා නම්, වාහනයේ ආපු කට්ටිය වාහනයට නගින්න මොහොතකට කලින් මේ වැඩේ කරන්න. මුලින්ම රියදුරු අසුනේ වීදුරුව සම්පූර්ණයෙන්ම පහත් කරන්න. දැන් රියදුරු අසුනට අනෙක් පැත්තේ දොර, ඒ කියන්නේ Passenger side එකේ දොර 5-6 වතාවක් වේගයෙන් අරින්න. වේගයෙන් වහන්න. වේගයෙන් කියන්නේ මේ දොර කැඩිලා යන තරමට නෙවෙයි හොදේ. සාමාන්ය වේගයකින් මේක කරන්න. ක්ෂණිකව වාහනය ඇතුලේ එකතු වෙලා තිබුණු සේරම රස්නේ වායුව එලියට විසි වෙලා වාහනේ සිසිල් වෙනවා ඔබට තේරේවි.
මෙතැනදී ඇතිවන වායු පීඩනය නිසා වාහනය ඇතුළේ තියෙන අධික රස්නය සහ විස වායු ටික අර ඇරලා තියෙන වීදුරුවෙන් තත්පර කිහිපයකින් එළියට විසි වෙනවා. මේ විදිහට විස වායු පිට කළාම AC එකට තියෙන්නේ සාමාන්ය උෂ්ණත්වයක තියෙන වාතය නිවන්න විතරයි. එතකොට සෞඛ්ය ආරක්ෂිතව ඉතාම කෙටි කාලයකින් වාහනය ඇතුලත සිසිල් වෙනවා. ඒ විතරක් නෙවෙයි, ඔයාගේ පෙට්රල් ටිකත් ඉතුරු වෙනවා. AC එකට තියෙන බරත් අඩු වෙනවා.
අංක 02 - 'Recirculation Mode' එක අමතක කිරීම
වාහනයක AC එක ක්රියා කරන ආකාර දෙකක් තියෙනවා. ඒ තමයි Fresh Air Mode එක හා Recirculation Mode එක.
Fresh Air Mode (පිටත වාතය): මේකේදී වෙන්නේ එළියේ තියෙන 35°C විතර රස්නය වාතය, හැම තත්පරේම ඇතුළට අරගෙන, ඒක 18°C-20°C දක්වා නිවන්න උත්සාහ කරන එකයි. ඒ කියන්නේ AC එකට පොඩ්ඩක් වත් නතර වෙන්න වෙලාවක් නැහැ, දිගටම "ෆුල් පවර්" එකෙන් වැඩ කරන්න ඕනේ.
Recirculation Mode (ඇතුළත වාතය): වාහනයේ Dashboard එකේ මේ බොත්තම හඳුනාගන්න පුළුවන් වෙන්නේ වංගු සහිත ඊතලයක් වාහනයක් ඇතුළේ තියෙන රූපයකින්. මේ බොත්තම On කළාම පිටතින් වාතය එන සිදුරු වැහෙනවා. දැන් AC පද්ධතිය කරන්නේ වාහනය ඇතුළේ දැනටමත් සිසිල් වෙලා තියෙන 22°C වාතයම ආපහු අරගෙන, තවත් ටිකක් සිසිල් කරන එක විතරයි. එතකොට AC එකට තියෙන්නේ ඉතාම පොඩි වැඩක්.
වාහනය ඇතුළේ දැනටමත් සීතල වුණු වාතය තියෙන නිසා, ඒක ආපහු සීතල කරන්න AC එකට හරිම ලේසියි. ඒ නිසා වාහනය ඉක්මනින් සීතල වෙනවා. AC Compressor එකට තියෙන වැඩ ප්රමාණය අඩු නිසා එන්ජිමට වැටෙන බර අඩු වෙනවා. ඒකෙන් පෙට්රල් පාවිච්චිය 10% - 15% කින් විතර අඩු වෙනවා. ඒ වගේම ඉස්සරහින් යන වාහනයක දුම, පාරේ තියෙන දූවිලි හෝ කුණු ගඳ වාහනය ඇතුළට ඒමත් 100% වළකිනවා.
Recirculation mode එක පොඩ්ඩකට OFF කල යුතු අවස්ථා දෙකක් තියෙනවා. වාහනය ඇතුළේ හතර පස් දෙනෙක් ඉන්නවා නම්, අපි ප්රශ්වාස කරන කාබන්ඩයොක්සයිඩ් (CO2) ප්රමාණය වැඩි වෙලා ඔයාට නිදිමත ගතියක් හෝ ක්ලාන්ත ගතියක් එන්න පුළුවන්. ඒ නිසා කට්ටියක් එක්ක දීර්ඝ ගමනක් යනවා නම්, පැයකට සැරයක් විනාඩි 2ක් විතර 'Fresh Air' mode එක දාන්න. එතකොට අලුත් ඔක්සිජන් ටිකක් වාහනය ඇතුළට එනවා.
ඒ වගේම වර්ෂාව තියෙන වෙලාවට Recirculation Mode එක On කරලා තිබ්බොත් වාහනයේ වීදුරු වල මීදුම (Fog) බැඳෙන්න පුළුවන්. ඒ වගේ වෙලාවට 'Fresh Air' mode එක On කරලා , හුළං පාර ඉස්සරහ වීදුරුව දෙසට (Defroster mode) හරවන්න. එතකොට තත්පර කිහිපයකින් මීදුම මැකිලා වීදුරුවේ පෙනීම හොද පැහැදිලි තත්වයට එනවා .
අංක 03 - වාහනය Start කරන විටම AC එක 'On' වී තිබීම
මේක වාහන පාවිච්චි කරන ගොඩක් දෙනෙක් අතින් සිද්ධ වෙන, හැබැයි වාහනයේ ආයු කාලයට සෘජුවම බලපාන ලොකු වැරැද්දක්. වාහනයක් පණගන්වන (Start කරන) වෙලාවට එන්ජිමේ පිස්ටන් ටික මුලින්ම කරකවන්න, Starter Motor එකට විශාල ශක්තියක් අවශ්යයි. AC එකත් On එකේ තිබුණොත්, ස්ටාටර් මෝටර් එකට සිද්ධ වෙනවා එන්ජිම විතරක් නෙවෙයි, AC Compressor එකත් එකපාරටම කරකවන්න. මේක හරියට බරක් උස්සන්න හදන මනුස්සයෙක්ගේ කර උඩට තව කෙනෙක් එකපාරටම පනිනවා වගේ වැඩක්.
ස්ටාටර් මෝටර් එකට වගේම, AC එකේ Fan එකට සහ අනෙකුත් උපාංග වලටත් අවශ්ය කරන, විශාල විදුලි ධාරාව එකවර බැටරියෙන් ලබා ගන්න ඕනේ. ඉතින් ඔයා හැමදාම වාහනේ START කරන කොට ac එක ON එකේම තිබුණොත් , බැටරියේ ආයු කාලය (Battery Life) සීඝ්රයෙන් අඩු වෙන්න පුළුවන්.
ඉතින් මේ දේ වලක්වා ගන්න ඔයා කරන්න ඕනේ දේවල් 2ක් තියෙනවා. පලවෙනි එක තමයි, සෑම ගමනක්ම අවසන් කරන්න , ඒ කියන්නේ Engine එක Off කරන්න, විනාඩි 1කට වගේ කලින් AC බොත්තම (A/C Button) විතරක් Off කරන්න. එතකොට පද්ධතියේ තියෙන තෙතමනයත් වේලිලා යනවා.
ඒ වගේම උදේට හරි , කොයිම වේලාවක හරි වාහනය Start කරලා, එන්ජිමේ වේගය (RPM) සාමාන්ය මට්ටමට එනකම් තත්පර 10-20ක් ඉඳලා, ඊට පස්සේ AC එක ON කිරන්න පුරුදු වෙන්න. මෙහෙම කරොත් , වාහන වල බැටරි සහ ස්ටාටර් මෝටර් වල ප්රශ්න වෙලා , නිතර නිතර මාරු කරන්න වෙන එකකුත් නෑ. AC පද්ධතියත් ආරක්ෂා වේවි. එන්ජිම ඇතුළු හැමදේටම හොදයි.
4. Cabin Filter එක පිරිසිදු නොකිරීම
මේක වාහන හිමිකරුවන් ගොඩක් දෙනෙක්ට අනවශ්ය වියදම් පටවන තැනක්. ගොඩක් අය කරන්නේ AC එකේ හුළං පාර මදි වුණාම ලොකු මුදලක් දීලා AC ගෑස් ගහන්න යන එක. හැබැයි ප්රශ්නය තියෙන්නේ රුපියල් 1500ක විතර පොඩි ෆිල්ටර් එකක වෙන්න පුළුවන්.
Cabin Filter එකෙන් කරන වැඩේ තමයි , එළියෙන් එන හුළං වල තියෙන දූවිලි, පරාග සහ කුණු රොඩු පෙරාගෙන, පිරිසිදු හුළං වාහනය ඇතුළට එවන එක. කාලයක් යනකොට මේ ෆිල්ටරය කුණු වලින් වැහෙනවා. එතකොට AC Fan එක කොච්චර වේගයෙන් කැරකුණත්, කැබින් ෆිල්ටරේ කුණු තට්ටුව නිසා හුළං ඇතුළට එන්න බැරිව හිර වෙනවා. හුළං එන්නේ නැති නිසා ඔයා කරන්නේ AC එකේ උෂ්ණත්වය තවත් අඩු කරන එකයි. එතකොට AC Compressor එක දිගටම වැඩ කරනවා. හැබැයි ෆිල්ටර් එක හිර වෙලානිසා වාහනය ඇතුළ සීතල වෙන්නෙත් නැහැ, පෙට්රල් ටික නිකන් අපරාදේ පිච්චෙනවා විතරයි.
මේක නිකන් හරියට ඔයා මඩ තට්ටුවක් ගැවිච්ච ෆේස් මාස්ක් එකක් දා ගත්තා වගේ වැඩක්. ඔයාට හුස්ම ගන්න මාර අමාරුයි නේද? ඔයා කොච්චර හයියෙන් හුස්ම ඇද්දත් පෙනහළු වලට වාතය යන්නේ නැහැ. ඔයාගේ වාහනයේ "නාසය" තමයි මේ Cabin Filter එක. ඒක මඩ/කුණු වලින් වැහුණාම වාහනයට "හුස්ම ගන්න" බැහැ.
ලංකාව වගේ දූවිලි අධික රටක මාස 6කට සැරයක්වත් මේ ෆිල්ටරය ගලවලා බලන්න. ගොඩක් වාහනවල මේක තියෙන්නේ ඉස්සරහ අසුනේ තියෙන 'Glove box' එක පිටුපසයි. Glove box' එක ගැලෙව්වම මේක තියෙන තැන සලකුණු කරලා තියෙනවා.
කැබින් ෆිල්ටරේ ලොකුවටම කුණු නැත්නම් හුළං පාරක් (Air blow) අල්ලලා පිරිසිදු කරගන්න පුළුවන්. හැබැයි කළු වෙලා නම් අලුත් එකක් දාන එක තමයි හොඳම.
වාහනය ඇතුළේ "ගඳක්" එනවා නම්, ඒකට ප්රධාන හේතුවත් මේ ෆිල්ටරයේ බැක්ටීරියා පිරීමයි. නැත්තම් සතෙක් මැරිච්ච ගදක් වගේ ආවත් මුලින්ම මේ ෆිල්ටර් ගලවලා බලන්න. ගොඩක් වෙලාවට හේතුව තියෙන්නේ එතන.
5. වාහනය නතර කර (Idle) වැඩි වෙලාවක් AC දමාගෙන සිටීම
මේක ගොඩක් දෙනෙක් පුරුද්දක් විදිහට කරන, හැබැයි වාහනයටයි ඔබේ සාක්කුවටයි දෙකටම හානි කරන වැඩක්. වාහනය දුවන්නේ නැතිව නතර කරලා තියෙන වෙලාවට AC එක දාගෙන ඉන්න එක (Idling) ඇයි මෙච්චර නරක කියලා අපි බලමු.
වාහනයක් වේගයෙන් දුවනකොට එන්ජිම කැරකෙන වේගය (RPM) වැඩියි. එතකොට AC Compressor එක කරකවන්න එන්ජිමට ලොකු වෙහෙසක් ගන්න අවශ්ය වෙන්නේ නැහැ. හැබැයි වාහනය නතර කරලා තියෙනකොට (Idle), එන්ජිම කැරකෙන්නේ ඉතාම අඩු වේගයකින්. ඒ වෙලාවට AC එක කරකවන්න එන්ජිමට හුඟක් අමතර ශක්තියක් වැය කරන්න වෙනවා.
වාහනය දුවනකොට ඉස්සරහින් එන හුළං පාර නිසා වාහනයේ රේඩියේටර් එක (Radiator) සහ AC Condenser එක ඉක්මනින් නිවෙනවා. හැැබැයි වාහනය නතර කරලා තියෙනකොට ඒ ස්වභාවික හුළං පාර එන්නෙත් නැහැ. එතකොට AC එක නිවන්න විදුලි පංකා (Electric Fans) දිගටම වැඩ කරන්න ඕනේ. මේකෙන් එන්ජිම අනවශ්ය ලෙස රත් වෙනවා. Idle එකේ තියෙනකොට එන්ජිම ඇතුළේ ඉන්ධන දහනය වෙන්නේ අඩුවෙන්. ඒ නිසා එන්ජිමේ පිස්ටන් වල සහ පද්ධතියේ කාබන් (Carbon) බැඳෙන්න තියෙන ඉඩකඩ වැඩියි.
ඔයා කොහේ හරි විනාඩි 5කට වඩා වැඩියෙන් ඉන්න බලාපොරොත්තු වෙනවා නම් , හොඳම දේ තමයි වීදුරු ටිකක් පහත් කරලා හෙවනක් තියෙන තැනක එන්ජිම නවත්වලා ඉන්න එක. මොකද වාහනයේ AC දාගෙන Idle එකේ පැයක් තිබ්බොත් පෙට්රල් ලීටර් 1ක් හෝ ඊට වැඩි ප්රමාණයක් නිකරුණේ පිච්චෙනවා. මේක ඔබේ මාසික තෙල් වියදමට ලොකු බරක්.
6. 'Econ' Mode එක පාවිච්චි නොකිරීම
වාහනයේ තෙල් ඉතුරු කරන්න විශේෂ පහසුකමක් (Econ Button) තිබියදීත්, ඒකෙන් වැඩක් වෙන්නේ නැහැ කියලා හිතලා පාවිච්චි නොකර සිටීම තමයි ඔබ කරන ඊලග වැරැද්ද. 'Econ' හෝ 'Eco' බොත්තම එබුවාම වාහනයේ පරිගණකය , ඒ කියන්නේ ECU එක මගින්, AC Compressor එක ක්රියා කරන ආකාරය වෙනස් කරනවා. සාමාන්යයෙන් Compressor එක දිගටම වැඩ කරනවා වෙනුවට, මෙහිදී එය වරින් වර විරාම ගනිමින් වැඩ කරනවා. ඒ වගේම Fan එකේ වේගයත් ඉතාම සියුම් ලෙස පාලනය කරනවා. මේ නිසා එන්ජිමට දෙන බර අඩු වෙලා පෙට්රල් 10% - 15% ක් විතර ඉතුරු කරගන්න පුළුවන්.
හැබැයි ඔයා වාහනය තද අව්වේ නවත්වලා තිබිලා ආපහු යන වෙලාවට විතරක් 'Econ' Mode එක Off කරන්න. මොකද එතකොට ඉක්මනින් රස්නය නිවන්න ඕනේ නිසා. වාහනය ඇතුළ සාමාන්ය මට්ටමට සීතල වුණාට පස්සේ ආපහු 'Econ' Mode එක දාන්න. එතකොට සුවපහසුව වගේම පෙට්රල් ඉතිරියත් දෙකම ලැබෙනවා.
7. Temperature එක 18°C වගේ උපරිම සීතලට දාගෙන සිටීම
ඉක්මනින් වාහනේ ඇතුල සීතල කර ගන්න ඕනේ නිසා, AC එකේ උෂ්ණත්වය (Temperature) අඩුම අගයට (16°C හෝ 18°C) දාගෙන ඉන්න එකත් ඔබ කරන ලොකු වැරද්දක්. ඔයා 18°C දැම්මොත්, වාහනය ඇතුළේ උෂ්ණත්වය ඒ මට්ටමට එනකම් AC Compressor එක "නොනවත්වා" වැඩ කරනවා. ලංකාව වගේ රස්නෙ රටක වාහනයක් ඇතුළේ උෂ්ණත්වය 18°C ට බස්සන එක Compressor එකට හරිම අමාරු වැඩක්. හැබැයි ඔයා ඒක 24°C හෝ 25°C වගේ සාමාන්ය මට්ටමක තිබ්බොත්, ඒ උෂ්ණත්වයට ආපු ගමන් Compressor එක නතර වෙලා එන්ජිමට විවේකයක් දෙනවා. ඇත්තටම 24°C කියන්නේ අපේ ඇඟට හරිම සුවදායක, ලෙඩ නොවෙන උෂ්ණත්වයක්. ඒ වගේම ඒකෙන් පෙට්රල් මාර විදිහට ඉතුරු වෙනවා.
අංක 08 - AC වැඩ කරද්දීම වාහනයේ එන්ජිම නැවත්වීම
මේක තමයි වාහනයක AC එකෙන් එන අර "පිළුණු වෙච්ච ගඳ" නැති කරගන්න තියෙන වටිනාම උපක්රමය. ගොඩක් අය හිතන්නේ මේ ගඳ එන්නේ සුවඳ විලවුන් වර්ග පාවිච්චි නොකරන නිසා කියලා. හැබැයි ඇත්තම හේතුව තියෙන්නේ AC පද්ධතිය ඇතුළේ. AC එක වැඩ කරනකොට වාහනය ඇතුළේ තියෙන 'Evaporator' කියන කොටස අධික ලෙස සීතල වෙනවා. හරියට අයිස් කැටයක් වගේ. ඔයා AC එක දාගෙන යනකොට මේ Evaporator එක මතුපිට වතුර බිංදු (Condensation) හැදෙනවා.
ඔයා ගමන අවසානයේ AC එක වැඩ කරද්දීම එන්ජිම නිව්වොත්, අර තෙතමනය ඒ විදිහටම පද්ධතිය ඇතුළේ ඉතිරි වෙනවා. අඳුරු සහ තෙතමනය සහිත මේ පරිසරය පුස් (Fungus) සහ බැක්ටීරියා හැදෙන්න කියාපු තැනක්. පස්සේ දවසක ඔයා ආපහු AC එක දානකොට, අර ඇතුළේ හැදුණු පුස් වල ගඳ තමයි හුළං පාරත් එක්ක එළියට එන්නේ.
✅ නිවැරදි ක්රමය තමයි The 2-Minute Rule කියලා කියන්නේ
ඔයා ගෙදරට හෝ ගමනාන්තයට ළඟා වෙන්න විනාඩි 2කට කලින් A/C බොත්තම විතරක් Off කරන්න. හැබැයි Fan එක දිගටම දුවන්න දෙන්න. එතකොට වෙන්නේ, එළියෙන් එන සාමාන්ය හුළං පාර නිසා අර Evaporator එක මතුපිට තියෙන තෙතමනය සම්පූර්ණයෙන්ම වේලිලා යනවා. පද්ධතිය වියළිව තියෙන නිසා පුස් හැදෙන්න ඉඩක් ලැබෙන්නේ නැහැ.
මේ ක්රමය නිසා පද්ධතියේ ඇති ලෝහ කොටස් මලකඩ කෑමත් (Corrosion) ගොඩක් දුරට අඩු වෙනවා. ඒ කියන්නේ ඔයාගේ AC පද්ධතියේ ආයු කාලයත් වැඩි වෙනවා.
9. අව්වේ වාහනය නවත්වන විට කිසිම ආවරණයක් නොකිරීම
මේක ගොඩක් අය "සුළු දෙයක්" කියලා හිතලා මඟහරින, හැබැයි AC පද්ධතියට , පෙට්රල් වලට වගේම වාහනයේ පෙනුමටත් ලොකු බලපෑමක් කරන වැරැද්දක්. වාහනයක වීදුරු හරියට "ග්රීන් හවුස්" (Greenhouse) එකක් වගේ වැඩ කරන්නේ. සූර්ය රශ්මිය වීදුරු හරහා ඇතුළට ආවම, ඒක Dashboard එකේ සහ සීට් වල වැදිලා තාපය බවට පත් වෙනවා. හැබැයි ඒ තාපයට ආපහු වීදුරුව හරහා එළියට යන්න බැහැ.
මේ නිසා එළියේ උෂ්ණත්වය 30°C වුණත්, පැය කිහිපයක් අව්වේ තිබ්බ වාහනයක් ඇතුළේ උෂ්ණත්වය 60°C - 70°C දක්වා ඉහළ යන්න පුළුවන්. ඔයා වාහනයට නැගලා AC දැම්මම, මේ 70°C රත් වෙච්ච වාතයයි, රත් වෙච්ච ප්ලාස්ටික් Dashboard එකයි නිවන්න AC එකට මහා පරිමාණයෙන් වැඩ කරන්න වෙනවා. ඒ කියන්නේ එන්ජිමෙන් උපරිම පෙට්රල් ප්රමාණයක් ඇදලා ගන්නවා.
Sunshade එකක් පාවිච්චි කරන්න: ඉස්සරහ වීදුරුවට (Windshield) රිදී පැහැති ආවරණයක් (Reflective Sunshade) දැමීමෙන් 80%ක් විතර සූර්ය රශ්මිය ආපහු හරවා යවන්න පුළුවන්.
Dashboard එක ආරක්ෂා වීම: රශ්මිය අඩු නිසා Dashboard එකේ ප්ලාස්ටික් වේලිලා ඉරිතැලීම (Cracking) සහ පාට මැකී යාම වළක්වා ගන්නත් මේක උදව් වෙනවා.
අංක 10. AC පද්ධතිය සර්විස් එකක් නොකර අවුරුදු ගණන් දුවන එක
මේක තමයි අපි හැමෝම අතින් වෙන ලොකුම අතපසුවීම. සාමාන්යයෙන් අපි එන්ජින් ඔයිල් මාරු කරනවා වගේ AC පද්ධතිය ගැන වද වෙන්නේ නැහැ. ගොඩක් අය කරන්නේ AC එකේ සීතල සම්පූර්ණයෙන්ම නැති වුණාම තමයි, කාර්මික ශිල්පියෙක් ගාවට යන්නේ. හැබැයි ඒ වෙනකොට ඔයාගේ සාක්කුවට වෙන්න ඕන හානිය වෙලා ඉවරයි.
AC පද්ධතිය ඇතුළේ තියෙන ගෑස් මට්ටම ඉතාම සුළු ප්රමාණයකින් අඩු වුණත්, ඇතුළත උෂ්ණත්වය බස්සන්න AC එකට ගොඩක් වෙලාව යනවා. එතකොට වෙන්නේ එන්ජිමෙන් බලය ලබාගෙන දුවන Compressor එක, වෙනදට වඩා වැඩි වෙලාවක් එක දිගට වැඩ කරන එකයි. Compressor එක වැඩි වෙලාවක් වැඩ කරනවා කියන්නේ එන්ජිම දිගටම "බරක්" ඇදගෙන ඉන්නවා කියන එකයි. ඔයා නොදැනුවත්වම පෙට්රල් ලීටර් ගණනක් නිකරුණේ වැය වෙන්නේ මෙන්න මෙතැනදීයි.
ගෑස් මට්ටම අඩු වුණාම ඒ එක්කම තියෙන Compressor Oil ප්රමාණයත් අඩු වෙනවා. එතකොට Compressor එක ඇතුළේ ලෝහ කොටස් එකිනෙක ඇතිල්ලීම නිසා අධික ලෙස රත් වෙලා Compressor එක මුළුමනින්ම පිච්චෙන්න පුළුවන් (Seize වීම). එතකොට වියදම ලක්ෂ ගණනක් වෙන්නත් පුළුවන්.
ඒ නිසා අවුරුද්දකට සැරයක්වත් දන්නා කියන AC technician කෙනෙක් ලවා ගෑස් ප්රෙෂර් එක බලන්න. ගෑස් අඩු වෙලා නම් ඒක වෙන්නේ කොහෙන් හරි ගෑස් ලීක් වෙන නිසා. ඒ නිසා ගෑස් ගැහීමට පෙර ලීක් එකක් තියෙනවාද කියලා බලන එක මුදල් ඉතුරු කරගන්න හොඳම ක්රමයයි.
🌟 AC පද්ධතිය ආරක්ෂා කරගන්න තවත් අමතර රහස් කිහිපයක්
1. වාහනය ඇතුළේ ආහාර ගැනීමෙන් වළකින්න
ගොඩක් අය වාහනය ඇතුළේ ඉඳන් කෑම කනවා. කෑම වල සුවඳ සහ ඒ වාෂ්ප AC පද්ධතිය ඇතුළේ තියෙන 'Evaporator' එකේ තැන්පත් වෙනවා. ඒක උඩ පුස් (Mold) හැදෙන්න මේ කෑම සුවඳ ලොකු උදව්වක් වෙනවා. අවසානයේ වාහනය ඇතුළේ හැමදාම පිළුණු වෙච්ච ගඳක් ඉතුරු වෙන්නේ ඒ නිසයි.
2. කුණු, දූවිලි සහ වැලි ඉක්මනින් ඉවත් කරන්න
වාහනයේ කාපට් උඩ වැලි සහ දූවිලි පිරිලා තියෙනවා නම්, AC එක දාපු ගමන් ඒ දූවිලි හුළඟත් එක්ක උඩට ඇදලා ගන්නවා. AC එක වැඩ කරන්නේ වාහනය ඇතුළේ තියෙන හුළඟම ඇදලා අරන් සීතල කරලා ආපහු එළියට එවන එකයි. ඉතින් කාපට් එකේ දූවිලි තිබුණොත්, ඒ ඔක්කොම ගිහින් අර අපි කලින් කතා කරපු Cabin Filter එකේ හිර වෙනවා. එතකොට හරිම ඉක්මනින් ෆිල්ටර් එක සවුත්තු වෙනවා.
ඒ නිසා පොඩි වැකුම් ක්ලිනර් තියෙනවා. පිටකොටුව පැත්තේ ගියා නම් අඩුවටම හොයාගෙන එන්න පුළුවන්. කාර් එක ඇතුලේ අනිවාර්යයෙන් එකක් තියා ගන්න.
3. වාහනය ඇතුළේ දුම්පානය (Smoking) කරන්න එපා
සිගරට් දුම කියන්නේ ඇලෙන සුළු (Sticky) දෙයක්. මේ දුම AC පද්ධතිය ඇතුළට ගියාම එහි තියෙන සියුම් කොටස් වල ඇලිලා, කවදාවත් යවන්න බැරි නරක ගඳක් වාහනය ඇතුළේ නිර්මාණය කරනවා.
4. සතියකට වරක්වත් විනාඩි 10ක් AC එක දුවන්න (ශීත කාලයක වුනත්)
AC පද්ධතිය ඇතුළේ තියෙන රබර් වළලු (O-rings) සහ සීල් (Seals) වේලෙන්න නොදී තබා ගැනීමට එහි ඇති ඔයිල් (Compressor Oil) පද්ධතිය පුරා ගමන් කළ යුතුයි. ඔබ AC පාවිච්චි නොකරන කෙනෙක් වුණත්, සතියකට වරක්වත් විනාඩි 10ක් වාහනේ AC එක උපරිම සීතලෙන් දුවන්න. එයින් අනාගතයේදී සිදුවිය හැකි ගෑස් ලීක් (Leak) වළක්වා ගන්න පුළුවන්.
5. හුළං එන සිදුරු (Vents) සම්පූර්ණයෙන්ම වසා තබන්න එපා
සීතල වැඩි නිසා සමහරු ඔවුන් ආසන්නයේ තියෙන සිදුරු (Air vents) සම්පූර්ණයෙන්ම වසා දැමීම සිදු කරනවා. මෙයින් පද්ධතිය ඇතුළේ පීඩනය (Pressure) වැඩි වී, 'Evaporator' එක මතුපිට අයිස් බැඳීමට (Freezing) පුළුවන් . එවිට සීතල හුළං ඒම සම්පූර්ණයෙන්ම නතර වෙන්න පුළුවන්. ඉතින් ඔයා හරි , ඔයාගේ වයිෆ් හරි , සීතලට හුළං පාර ඇඟට වදිනවට අකමැති කෙනෙක් නම් AC vents වහනවා වෙනුවට එහි දිශාව වෙනස් කරන්න.
6. අධික වේගයෙන් යන විට AC එක On/Off කිරීමෙන් වළකින්න
එන්ජිම ඉතා අධික වේගයකින් (High RPM) කරකැවෙන වෙලාවක එකපාරටම AC එක On කළහොත්, Compressor එකේ ක්ලච් එකට (Compressor Clutch) අධික කම්පනයක් දැනී එය කැඩී යන්න පුළුවන්. AC එක On කිරීමට අවශ්ය නම්, වේගය මඳක් අඩු කර හෝ RPM එක අඩු වූ වෙලාවක එය සිදු කරන්න.
හරි අපි දැන් ගොඩක් දේවල් ගැන කතා කරා. විශ්ම ලෝකය මගින් කියා දීපු මේ දේවල් ඔයාට තාමත් සංකීර්ණ නම් , වාහනයේ AC ටික හරියටම adjust කරගෙන වාහනේ පදින හැටි බොහොම කෙටියෙන් දැන් ඔබට කියන්නම්.
🏆 වාහනයක AC පාවිච්චි කරන්න ඕනේ නිවැරදිම පිළිවෙළ (Perfect Routine)
ඔයා වාහනයට ගොඩ වුණ වෙලාවේ ඉඳන් ගමන අවසන් කරනකම් AC එක පාවිච්චි කරන්න ඕනේ මෙන්න මෙහෙමයි:
1. ගමන ආරම්භයේදී (Start)
පියවර 01: වාහනයට නැග්ග ගමන් වීදුරු 4ම පහත් කරන්න. (AC එක දාන්න එපා).
පියවර 02: වාහනය පණගන්වා (Start) විනාඩියක් විතර දුවන්න. එතකොට ඇතුළේ තියෙන විස වායු සහ රස්නය එළියට යනවා.
පියවර 03: දැන් වීදුරු වසා AC එක On කරන්න.
පියවර 04: මුලින්ම 'Fresh Air' mode එකේ විනාඩි 2ක් දුවන්න, පස්සේ 'Recirculation' mode එකට මාරු කරන්න.
2. ගමන අතරතුර (During the Drive)
උෂ්ණත්වය (Temperature): 24°C හෝ 25°C මට්ටමේ තබා ගන්න. (එතකොට පෙට්රල් ඉතුරුයි).
සීතල මදි නම්: Temperature එක 18°C ට බස්සන්නේ නැතිව, Fan එකේ වේගය (Fan Speed) වැඩි කරන්න.
හුළං සිදුරු (Vents): හුළං සිදුරු කෙලින්ම මූණට හෝ ඇඟට හරවා ගන්නේ නැතිව, උඩට හෝ පසෙකට හරවන්න. (සෞඛ්යයට හොඳයි).
3. ගමන අවසානයේදී (Arrival)
ගමනාන්තයට විනාඩි 2කට කලින්: AC එකේ A/C බොත්තම පමණක් Off කරන්න.
Fan එක: Fan එක දිගටම වැඩ කරන්න දෙන්න. මෙයින් AC පද්ධතිය ඇතුළේ තියෙන තෙතමනය වේළී ගොස්, නරක ගඳ ඇතිවීම වළක්වයි.
නැවැත්වීම: වාහනය නවතා එන්ජිම Off කිරීමට පෙර AC එක සම්පූර්ණයෙන්ම Off වී ඇති බව සහතික කරගන්න.
එහෙනම් අද ඉදන් , මේ වැරදි මඟහැරලා ඔබේ වාහනයේ AC එක නිවැරදිව පාවිච්චි කරන්න පටන් ගන්න. මේ පුංචි වෙනස්කම් ටික ඔයාගේ මුදල් වගේම AC පද්ධතිය ඇතුළු සමස්ත වාහනයේම ආයු කාලයත් රැක දේවි!
උපුටා ගන්න ලදී.
