07/08/2025
សម្តេចធិបតី៖ កម្ពុជា និងថៃ ចុះហត្ថលេខាលើកិច្ចព្រមព្រៀងបទឈប់បាញ់ ១៣ចំណុច បន្ទាប់ពីកិច្ចប្រជុំវិសាមញ្ញគណៈកម្មាធិការព្រំដែននៅប្រទេសម៉ាឡេស៊ី
---
នៅរសៀលកាលពីថ្ងៃទី ៧ ខែសីហានេះ កិច្ចប្រជុំវិសាមញ្ញនៃគណៈកម្មាធិការព្រំដែនទូទៅ(GBC) រវាងថៃ និងកម្ពុជា បានបញ្ចប់ ដោយប្រទេសទាំងពីរបានឯកភាពគ្នាលើកិច្ចព្រមព្រៀងអនុវត្តបទឈប់បាញ់ចំនួន ១៣ចំណុច។ តំណាងប្រទេសទាំងពីរ បានចុះហត្ថលេខាលើកំណត់ហេតុ ដែលបានឯកភាពគ្នា ក្នុងគោលបំណងដោះស្រាយភាពតានតឹងតាមព្រំដែន និងស្តារសន្តិភាព នៅតំបន់ព្រំដែនឡើងវិញ។
នាយករដ្ឋមន្រ្តីកម្ពុជា សម្ដេចធិបតី ហ៊ុន ម៉ាណែត បានសម្ដែងការអបអរសាទរ ចំពោះការប្រព្រឹត្តទៅដោយជោគជ័យនៃកិច្ចប្រជុំវិសាមញ្ញនៃគណៈកម្មាធិការព្រំដែនទូទៅ កម្ពុជា-ថៃ (Extraordinary GBC Meeting) នាថ្ងៃទី៧ ខែសីហានេះ។
សម្ដេចធិបតី គូសបញ្ជាក់ថា កិច្ចប្រជុំនេះ ជាការអនុវត្តនូវចំណុចដែលបានឯកភាពគ្នា រវាងសម្ដេច និង ឯកឧត្ដម Phumtham Wechayachai នាយករដ្ឋមន្ត្រីស្តីទីថៃ នៅក្នុងកិច្ចប្រជុំពិសេស នៅទីក្រុង Putrajaya ប្រទេសម៉ាឡេស៊ី កាលពីថ្ងៃទី២៨ ខែកក្កដា ឆ្នាំ២០២៥ ដែលសហរៀបចំដោយម៉ាឡេស៊ី និងសហរដ្ឋអាមេរិក និងដោយមានការចូលរួមពីចិនផង។
លទ្ធផលនៃកិច្ចប្រជុំ GBC នៅថ្ងៃព្រហស្បតិ៍នេះ រួមមាន ភាគីទាំងពីរ កម្ពុជា-ថៃបានពិភាក្សានិងឯកភាពគ្នាលើលក្ខខណ្ឌនៃការអនុវត្តបទឈប់បាញ់ និងការបង្កើនការប្រាស្រ័យទាក់ទងគ្នារវាងកងទ័ពទាំងពីរ។ ភាគីទាំងពីរក៏បានយល់ព្រមជំរុញការរៀបចំលក្ខខណ្ឌប្រតិបត្តិនៃយន្តការតាមដានត្រួតពិនិត្យការអនុវត្តបទឈប់បាញ់របស់ក្រុមអ្នកសង្កេតការណ៍អាស៊ាន (ASEAN Observer Team) និងឯកភាពឱ្យមានក្រុមអ្នកសង្កេតការណ៍បណ្តោះអាសន្ន (Interim Observer Team) ដឹកនាំដោយអនុព័ន្ធយោធាម៉ាឡេស៊ីដើម្បីសង្កេតការណ៍ភ្លាមៗ និងបន្តរៀបចំក្រុមអ្នកសង្កេតការណ៍អាស៊ាន (ASEAN Observer Team)។
ភាគីទាំងពីរក៏បានឯកភាព រៀបចំកិច្ចប្រជុំរួមនៃគណៈកម្មាធិការព្រំដែនថ្នាក់ភូមិភាគ (RBC) ក្នុងរង្វង់ពីរសប្តាហ៍ និងកិច្ចប្រជុំគណៈកម្មាធិការព្រំដែនទូទៅ កម្ពុជា-ថៃ (GBC) ក្នុងរង្វង់មួយខែក្រោយកិច្ចប្រជុំវិសាមញ្ញ GBC នេះ។ ក្នុងករណីចាំបាច់ភាគីទាំងពីរអាចកោះប្រជុំ វិសាមញ្ញនៃគណៈកម្មាធិការព្រំដែនទូទៅ កម្ពុជា-ថៃ (Extraordinary GBC Meeting) ក្នុងទម្រង់ដូចលើកនេះ។
ក្រៅពីនេះ កម្ពុជាក៏បានស្នើសុំឲ្យមានការដោះលែងយោធិនកម្ពុជាទាំង ១៨រូបដែលស្ថិតនៅក្នុងការឃុំគ្រងរបស់កងទ័ពថៃឲ្យបានឆាប់រហ័សផងដែរ។
សូមជម្រាបជូនថា កិច្ចប្រជុំវិសាមញ្ញនាពេលនេះ ធ្វើឡើងបន្ទាប់ពីភាគីទាំងពីរ បានជួបគ្នាក្នុងកម្រិតលេខាធិការដ្ឋាន ចាប់តាំងពីថ្ងៃទី៤ ខែសីហាកន្លងទៅ។ កិច្ចប្រជុំនាពេលនេះ ក៏ធ្វើឡើងបន្ទាប់ពីប្រទេសទំាងពីរបានព្រមព្រៀងគ្នាលើបទឈប់បាញ់ភ្លាមៗ កាលពីថ្ងៃទី២៨ ខែកក្កដា ដោយមានការសម្របសម្រួលពីនាយករដ្ឋមន្ត្រីម៉ាឡេស៊ី ដែលជាគំនិតផ្តួចផ្តើមរបស់ប្រធានាធិបតីសហរដ្ឋអាមេរិក លោក ដូណាល់ ត្រាំ៕
ផ្សាយថ្ងៃទី៧ ខែសីហា ឆ្នាំ២០២៥
ប្រភព៖ Samdech Thipadei Hun Manet (https://t.me/Dr_Hunmanetofcambodia/232388), Khaosod English (https://x.com/KhaosodEnglish/status/1953349592470438211)
