11/09/2026
នាព្រឹកថ្ងៃទី១០ ខែកញ្ញា ឆ្នាំ២០២៦ ក្រុមហ៊ុនកម្ពុជាតេលា បានរៀបចំកិច្ចប្រជុំបូកសរុបលទ្ធផលការងារឆមាសទី១ និងទិសដៅអនុវត្តឆមាសទី២ ឆ្នាំ២០២៦ របស់តេលាខ្មែរ ក្រោមអធិបតីភាពរបស់លោកឧកញ៉ា ឈុន វ៉ាន់ឌី អគ្គនាយករង ក្រុមហ៊ុនកម្ពុជាតេលា មានការចូលរួមពីម្ចាស់ដៃគូអាជីវកម្ម ប្រធាន និងជំនួយការស្ថានីយតេលាខ្មែរទូទាំងប្រទេស។ គោលបំណងស្វែងយល់ពីចំណុចខ្លាំង ចំណុចខ្សោយ និងដើម្បីកែសម្រួលបន្តការអភិវឌ្ឍន៍គុណភាពសេវាកម្ម។
ក្នុងឱកាសនោះ លោកឧកញ៉ា អគ្គនាយករង បានលើកឡើង ៤ចំណុចសំខាន់ៗ ដើម្បីពង្រឹង និងអភិវឌ្ឍសេវាកម្មតេលាខ្មែរឱ្យល្អប្រសើរឡើង៖
ចំណុចទី១ ការទទួលស្វាគមន៍អតិថិជន៖ ការផ្តល់សេវាកម្មនេះគឺអនុវត្តចាប់ពីប្រធាន អនុប្រធាន និងអ្នកចាក់ប្រេងនៅស្ថានីយ រួមសហការផ្តល់សេវាកម្មដល់អតិថិជន ផ្តោតលើការទទួលស្វាគមន៍ សំពះជម្រាបសួរតាមបែបវប្បធម៌ខ្មែរ សុភាពរាបសារ និងរួសរាយរាក់ទាក់ជាប្រចាំ (Consistency) និងអនុវត្តប្រចាំថ្ងៃ (Daily Repetition)។
ចំណុចទី២ សោភ័ណ្ឌភាព និងអនាម័យក្នុងស្ថានីយ៖ បុគ្គលិកទាំងអស់ត្រូវចូលរួមសហការគ្នា ថែទាំនូវសោភ័ណ្ឌភាព ឧបករណ៍ បរិក្ខា និងអនាម័យទូទៅក្នុងស្ថានីយដើម្បីធានាថាបរិវេណស្ថានីយ មានសណ្តាប់ធ្នាប់ល្អ ស្អាត និងមានអនាម័យជាប្រចាំ។
ចំណុចទី៣ សន្តិសុខ និងសណ្តាប់ធ្នាប់៖ ត្រូវយកចិត្តទុកដាក់ជាប្រចាំលើសុវត្ថិភាព និងសន្តិសុខ សណ្តាប់ធ្នាប់នៅក្នុងស្ថានីយដើម្បីផ្តល់ភាពងាយស្រួល និងភាពកក់ក្តៅជូនអតិថិជនពេលមកប្រើប្រាស់សេវាកម្មនៅតេលាខ្មែរ។ ជាពិសេស ប្រធាន, សន្តិសុខ និងអ្នកចាក់ប្រេង ត្រូវប្រុងប្រយ័ត្នខ្ពស់ពេលចាក់ប្រេងជូនអតិថិជន និងពេលរថយន្តចូលទំលាក់ប្រេង ក្នុងស្តុកស្ថានីយ។
ចំណុចទី៤ ការដោះស្រាយបញ្ហាជាមួយអតិថិជន៖ ត្រូវដោះស្រាយរាល់បញ្ហា និងសំណូមពររបស់អតិថិជនឱ្យបានទាន់ពេលវេលា ប្រធានស្ថានីយចុះជួយផ្ទាល់ជាមួយបុគ្គលិកសេវាកម្ម ព្រមទាំងជួប ប្រាស្រ័យទំនាក់ទំនងជាមួយអតិថិជនដើម្បីស្វែងយល់ លើចម្ងល់ ឬបញ្ហាដើម្បីដោះស្រាយ ហើយអនុវត្តតាម 5W1H ដើម្បីវិភាគព័ត៌មានឱ្យបានច្បាស់លាស់ គ្រប់ជ្រុងជ្រោយរួមមាន៖ តើមានអ្វីកើតឡើង? (What), តើអ្នកណាជាអ្នកពាក់ព័ន្ធ ឬអ្នកធ្វើ? (Who), តើបញ្ហាបានកើតឡើងនៅពេលណា? (When), តើកើតឡើងនៅទីណា? (Where), តើហេតុអ្វីបានជាបញ្ហានោះកើតឡើង? (Why), និងតើត្រូវដោះស្រាយ ឬអនុវត្តដោយវិធីណា? (How)។ ការអនុវត្ត 5W1H ដើម្បីកំណត់បញ្ហា និងរកមូលហេតុឱ្យបានច្បាស់លាស់ក្នុងការការពារ និងកែតម្រូវ បន្តការអភិវឌ្ឍន៍ការងារឱ្យកាន់តែប្រសើរ និងមានប្រសិទ្ធភាព។
លោកអគ្គនាយករង បានធ្វើការណែនាំបន្ថែមថា ដើម្បីឱ្យសេវាកម្មកាន់តែល្អប្រសើរ បុគ្គលិកទាំងអស់ត្រូវប្រកាន់ខ្ជាប់នូវវិន័យ (Discipline yourself) មានឥរិយាបថល្អគ្រប់ពេល គោរពតាមបទបញ្ជាផ្ទៃក្នុង និងស្តង់ដាប្រតិបត្តិការការងារ (SOP)។ ជាពិសេស ត្រូវបន្តអភិវឌ្ឍកែលម្អសេវាកម្ម តាមរយៈការចាប់ផ្តើមធ្វើកិច្ចការងារតូចៗដដែលៗ រៀនសូត្ររៀងរាល់ថ្ងៃ និងទទួលយកមតិយោបល់ស្ថាបនា និងសំណូមពរនានា ដើម្បីឆ្លើយតបទៅនឹងតម្រូវការរបស់អតិថិជន។
ជាទីបញ្ចប់ លោកឧកញ៉ា សង្ឃឹមជឿជាក់ ដល់ប្រធាន និងជំនួយការ ដែលមានវត្តមាននៅទីនេះ ត្រូវរក្សាការអនុវត្តការងារឱ្យមានស្តង់ដា ការរួមស្មារតី និងការប្តេជ្ញាចិត្តទាំងអស់គ្នា ដើម្បីសម្រេចគោលដៅនៅឆមាសទី២ ឆ្នាំ២០២៦ នេះ។
ខ្មែរគាំទ្រក្រុមហ៊ុនខ្មែរ សម្រាប់ប្រជាជនខ្មែរ! 🇰🇭🙏
