03/08/2019
ក្រុមហ៊ុន ASUS បានដាក់បង្ហាញនូវកុំព្យូទ័រយួរដៃធ្វើពីមាសនិងស្បែក ដើម្បីប្រារព្ធខួប ៣០ ឆ្នាំរបស់ខ្លួន
ក្រុមហ៊ុន ASUS កំពុងតែប្រារព្ធខួប ៣០ ឆ្នាំរបស់ខ្លួនជាមួយនឹងកុំព្យូទ័រយួរដៃស៊េរីពិសេសមួយដែលមានឈ្មោះថា ASUS ZenBook Edition 30។ កុំព្យូទ័រយួរដៃស៊េរីថ្មីនេះក្រាលដោយស្បែកពណ៌ស និងផ្លាកឡូហ្គោធ្វើពីមាសពណ៌ផ្កាឈូកចំនួន ១៨ ការ៉ាត់។ ASUS មិនបានក្រាលស្បែកពេញតួខ្លួនដូចកុំព្យូទ័របន្ទះ HP Leather Folio របស់ក្រុមហ៊ុន HP ឬកុំព្យូទ័រប្រភេទកូនកាត់ នោះទេ។
ប្រធានក្រុមហ៊ុន ASUS លោក Jonney Shih បានពន្យល់ថា រាល់ស្បែកសុទ្ធទាំងអស់ គឺត្រូវបានជ្រើសរើសដោយដៃផ្ទាល់ ហើយគម្របនីមួយៗត្រូវបានដេរដោយផ្ចិតផ្ចង់បំផុតដោយអ្នកជំនាញកាត់ដេរ។
កុំព្យូទ័រនេះនឹងបំពាក់មកជាមួយនូវ Processor Core i7 ជំនាន់ទី៨ របស់ក្រុមហ៊ុន Intel, ក្រាហ្វិក GeForce MX250 របស់ Nvidia, RAM ទំហំរហូតដល់ ១៦GB និងអង្គផ្ទុកទិន្នន័យប្រភេទ PCIe SSD។ ជាមួយអេក្រង់ទំហំ ១៣ អ៊ីង កុំព្យូទ័រយួរដៃនេះមានផ្ទៃអេក្រង់លាតសន្ធឹង ៩៥% នៃតួខ្លួនទាំងមូល។ ASUS ក៏បានបញ្ចូល ScreenPad នៅក្នុង Trackpad ផងដែរ។
ក្រុមហ៊ុន ASUS ក៏កំពុងតែធ្វើការផ្គត់ផ្គង់គ្រឿងបរិក្ខារពិសេសៗសម្រាប់កុំព្យូទ័រយួរដៃប្រភេទស្បែកនេះ រួមបញ្ចូលទាំង mouse ពណ៌ស និងកាបូបស្បែកផងដែរ។ វាមិនមែនជាលើកទីមួយទេដែលក្រុមហ៊ុន ASUS បានធ្វើការបំពាក់ស្បែកនៅលើប្រភេទកុំព្យូទ័រយួរដៃរបស់ខ្លួន។ ជាក់ស្តែង ក្រុមហ៊ុន ASUS បានដាក់បង្ហាញកុំព្យូទ័រយួរដៃស្បែកប្រភេទ S6F ជាលើកដំបូងរបស់ខ្លួននៅក្នុងឆ្នាំ ២០០៦ ជាមួយនឹងគម្រប និងទ្រនាប់ដៃផ្ទៃខាងក្នុងក្រាលដោយស្បែក។
ក្រុមហ៊ុន ASUS មិនទាន់បញ្ចេញតម្លៃ និងកាលបរិច្ឆេទនៃការចេញលក់កុំព្យូទ័រយួរដៃប្រភេទនេះនៅឡើយទេ ប៉ុន្តែដោយសារកុំព្យូទ័រប្រភេទនេះផលិតឡើងក្នុងចំនួនតិច ដូច្នេះ វានឹងមិនមែនជាកុំព្យូទ័រយួរដៃទំហំ ១៣ អ៊ីង ដែលមានតម្លៃថោកនោះទេ៕
