29/09/2026
किल्ले दुर्गाडी येथे ११ ते २० ऑक्टोबरदरम्यान शारदीय नवरात्रोत्सव भव्य स्वरूपात साजरा करण्यात येणार असून, या उत्सवाच्या पूर्वतयारी व नियोजनासाठी मंगळवारी किल्ले दुर्गाडी येथे महत्त्वपूर्ण बैठक पार पडली. किल्ले दुर्गाडी देवस्थान नवरात्रोत्सव समिती अध्यक्ष रवी पाटील, कल्याण-डोंबिवली महानगरपालिका, सार्वजनिक बांधकाम विभाग, पोलीस प्रशासन तसेच विविध शासकीय विभागांचे अधिकारी आणि शिवसेनेचे नगरसेवक व पदाधिकारी या बैठकीला उपस्थित होते.
नवरात्रोत्सवाच्या काळात किल्ले दुर्गाडी येथे सुमारे पाच लाख भाविक देवीच्या दर्शनासाठी येत असतात. त्यामुळे भाविकांची सुरक्षितता, वाहतूक व्यवस्था, किल्ल्यावर आवश्यक नागरी सुविधा, वीज, पाणी, स्वच्छता, वैद्यकीय सुविधा तसेच गर्दीचे व्यवस्थापन याबाबत बैठकीत सविस्तर चर्चा करण्यात आली. विविध शासकीय यंत्रणांमध्ये समन्वय ठेवून उत्सव सुरळीत पार पाडण्याचे नियोजन करण्यात आले.
शिवसेनाप्रमुख बाळासाहेब ठाकरे यांनी बंदी हुकूम मोडल्यानंतर किल्ले दुर्गाडी येथे सुमारे ५० ते ५५ वर्षांपासून नवरात्रोत्सवाची परंपरा सुरू असल्याचे यावेळी सांगण्यात आले. किल्ल्याचा जीर्णोद्धारही करण्यात आला आहे. या उत्सवाला उपमुख्यमंत्री एकनाथ शिंदे, खासदार डॉ. श्रीकांत शिंदे यांच्यासह सर्वपक्षीय लोकप्रतिनिधी उपस्थित राहणार असल्याची माहिती किल्ले दुर्गाडी देवस्थान नवरात्रोत्सव समितीचे अध्यक्ष तथा शिवसेना कल्याण शहरप्रमुख रवी पाटील यांनी दिली.
उत्सवाच्या पार्श्वभूमीवर प्रशासनाने सर्व आवश्यक उपाययोजना वेळेत पूर्ण कराव्यात आणि भाविकांना सुरक्षित व शिस्तबद्ध वातावरणात देवीचे दर्शन घेता यावे, यासाठी संबंधित विभागांनी परस्पर समन्वयाने काम करण्याचे बैठकीत निश्चित करण्यात आले.
#किल्लेदुर्गाडी #दुर्गाडीदेवी #नवरात्रोत्सव #दुर्गाडीनवरात्रोत्सव #शारदीयनवरात्रोत्सव #कल्याण #कल्याणडोंबिवली #दुर्गाडी किल्ला #रवीपाटील #एकनाथशिंदे #डॉश्रीकांतशिंदे #नवरात्र२०२६ #देवीदर्शन #भाविकांचीसेवा #नवरात्रोत्सव२०२६ #आपलेशहरनामा #आपलेशहरवृत्तसमूह
