24/07/2026
《 # 我仔問我：生活香港定中國開心啲？》
食飯嗰陣，我仔突然問我：
「爸爸，香港人開心啲，定中國人開心啲？」
我望住佢，心諗而家啲細路真係仆街，細細個已經識問一啲大人答完會少幾個朋友嘅問題。
我冇即刻答，反而問佢：
「今屆世界盃，阿根廷球迷同佛得角球迷，邊個開心啲？」
佢話：「梗係阿根廷啦，阿根廷咁勁。」
的確，阿根廷係上屆冠軍，今屆又殺入決賽。佛得角呢？全國得五十幾萬人，今屆先係歷史上第一次參加世界盃。
論實力、球星、往績同世界排名，兩隊根本唔係同一個級數。
但最後，阿根廷決賽加時輸畀西班牙，只得亞軍。佛得角就殺入32強，仲同阿根廷踢到加時，先至僅負2比3。
你話邊邊球迷開心啲？
阿根廷球迷捧住銀牌低頭，心入面諗嘅係：
「上屆明明係冠軍，點解今屆冇咗？」
佛得角球迷兩手空空，但抬起頭諗：
「我哋第一次嚟，就差啲殺死衛冕冠軍。」
一隊踢到決賽，輸一場就好似國喪；另一隊32強出局，返到機場可能搞到似凱旋登基。
所以，人開唔開心，未必只睇佢行到幾遠，而係睇佢比自己原本預期行多咗，定行少咗。
阿根廷球迷係用冠軍標準衡量今日；佛得角球迷係用「以前連世界盃都未入過」衡量今日。
一個望住失去咗嘅獎盃；一個望住第一次攞到嘅入場券。
香港同中國嘅分別，有時亦係呢種心理。
香港今日喺好多方面，底子可能仍然較高。但香港人記得以前嘅黃金年代，記得自己曾經以為只要繼續踢落去，就會年年爭冠軍。
依家即使仲入到決賽，大家第一個反應都可能係：
「點解以前有冠軍，今日得亞軍？」
中國有啲人則係由以前連外圍賽都過唔到，到今日終於行入大球場。城市變新、交通變快、生活選擇增加。就算未捧盃，只要感覺自己一屆行得比一屆遠，球迷自然願意繼續嗌。
當然，呢個只係比喻。中國唔係人人都覺得自己入咗世界盃，（現實入到130強xd）有啲人搵唔到工、供緊跌價樓，感覺自己連後備席都冇份坐。
香港亦唔係人人都輸緊。有人照樣入波、搵到機會，仲嫌睇電視班觀眾日日唱衰煩撚過旁述。
一個國家唔係一隊波，幾億人亦唔可能共享同一張賽果。
但人嘅幸福感，的確唔只來自排名。
香港踢完都唔知自己代表緊邊個。
有時，亞軍比32強更傷心。
因為一個諗住自己失去咗冠軍；另一個知道自己創造咗歷史。
我仔聽完再問：
「咁究竟香港定中國開心啲？」
我話：
「未必係行得最遠嗰個，而係覺得自己仲行緊向前嗰個。」
佢諗咗一陣，話：
「但阿根廷始終都係世界亞軍，佛得角始終輸咗喎。」
我點點頭：
「冇錯。所以排名只可以話你知邊隊勁啲，唔可以話你知邊個開心啲。」
有時，一個人攞住銀牌，好似死老豆。
另一個人乜獎都冇，卻笑到好似贏撚咗成個世界。
