24/05/2026
خصك تعرف واحد قضية قبل من نهضرو ان صمعة ديال شوافر مغاربة راه جيدة بمقارنة مع بزاف ديال دول اخرى بمعنى انك كمغربي كين ناس قبل منك مهدو لك طريق باش تسلك لا من حيث تشيفورت لا من حيث تمعلميت ولا من حيث مغامرة ولا من حيث تقة الا حطينا شيفور واحد من مغرب وحطينا الف شيفور من رومانيا او دول لاتينيا ميحركو والو فكفة ديال مغربي ندوزو دبا لدولة لتبعا إسبانيا وفرنسا لي هيا برتقيس
البرتغال
مجال ديال سياقة الشاحنات (الرموك) في البرتغال ولاّ عليه طلب كبير هاد الأيام، وبزاف ديال الشيافر كيشوفوه بوابة ممتازة للخدمة والاستقرار في أوروبا
شحال كيتخلصو شوافر ؟ وكيفاش دايرة الخدمة؟
قطاع النقل اللوجستي وسياقة الشاحنات من الصنف الثقيل (C+E) في البرتغال كايعرف نقص كبير في اليد العاملة، الشي اللي خلا الشركات البرتغالية تحل البيبان للشيافر المهنيين من برا. ولكن مكيعنيش جلهم من المغرب حيث برتغال دولة ممعروفاش المغاربة مع علم البرتغال موقعها استراتيجي، وهي الطريق الرئيسية اللي كتربط الموانئ الكبرى بباقي دول أوروبا.
في البرتغال، الخدمة مقسومة لجوج أنواع رئيسية، وكل واحد والمميزات ديالو:
الخط الداخلي Nacional الخدمة كتكون غير داخل البرتغال، بين المدن والموانئ بحال لشبونة وبورتو. الميزة ديالها هي أنك كتخدم بالنهار وترجع لدارك (أو لشركتك) في العشية أو في الويكاند. لكن الصالير ديالها كيكون ناقص شوية.
لخط الدولي Internaciol هنا فين كاين الصرف. كتخرج بالرموك لفرنسا، إسبانيا، ألمانيا، وبلجيكا. السيستيم ديال الخدمة غالباً كيكون مرن؛ مثلاً كتسوق 6 لـ 8 ديال السيمانات تتابع، وكاتاخد موراها سيمانة أو جوج ديال الراحة (تجلس فيها في الدار).
لصاليرات: شحال كيتخلص الشيفور في البرتغال؟
الشركات البرتغالية كيتعاملوا بسيستيم "الصالير الأساسي" بوزيد عليه "البريمات والديام" (Subsídios).
الخطوط الداخلية:لصالير الصافي (Net) كيدور بين 1,000 و 1,400 يوروعلى حسب السوايع الزايدة.
لخطوط الدولية (الرموك الكبير C+E)لصالير الصافي كيوصل ما بين 2,400 و 3,000 يورو في الشهر. هاد البركة داخلة فيها التعويضات ديال الماكلة، والنعاس في الكاميو، والشركات الكبار هما اللي كايعطيو هاد الصاليرات.
قانون 14 شهر (الميزة البرتغالية): في البرتغال، القانون كيعطيك 14 صالير في العام ماشي غير 12! كاتاخد صالير زايد في الصيف (ديال العطلة) وصالير زايد في شهر 12 (ديال راس العام).
ظروف الطريق وقوانين السوڭان
البرتغال داخلة في الاتحاد الأوروبي، يعني مكاينش اللعب مع "التاكوغراف" (القرص الرقمي). القوانين صارمة وباش تحمي الشيفور:
سوايع القيادة:عندك الحق تسوق 9 ديال السوايع في النهار كحد أقصى (وتقدر تزيدها لـ 10 السوايع جوج مرات في السيمانة فقط).
الراحة الإجبارية:خاصك ضروري توقف ترتاح 45 دقيقة بعد كل 4 سوايع ونص ديال السوڭان. والراحة الأسبوعية (الويكاند) ضرورية باش الشيفور ما يعياش.
حالة الطرقان:لطرقان السيار (Autoroutes) في البرتغال غزالين ونقيين، والجو تماك دافئ وقريب للجو ديال المغرب، يعني مكاينش ديك الصعوبة ديال الثلج والجليد بحال دول شمال أوروبا، من غير يلا كنتي شاد الجبل جيهة الحدود مع إسبانيا.
الموراق والوثائق اللي خاصينك
باش تخدم "شيفور د الرموك" قانوني في البرتغال، خاصك هاد الوراق ضروري:
بيرمي من الصنف الثقيل: يكون عندك (C) و (C+E) وتكون شابع صوڭان وخبرة.
بطاقة الكفاءة المهنية Code 95هادي هي الساروت ديال الخدمة في أوروبا كاملة. بلا بيها ما تسوقش شاحنة تجارية.
بطاقة التاكوغراف الرقمية Carte Chronotachygraphe الكارت اللي كتحسب ليك السوايع والراحة.
شهادة ADR (ديال الماتريال يلا كانت عندك، كتطلع ليك قيمتك في السوق والصالير كيزيد يطير لفوق. لي غنقول لك ان البرتغال واخا الصالير الأساسي ديالها طايح شوية مقارنة بفرنسا ولا ألمانيا، المعيشة فيها رخيصة، والوراق ديالها كيوجدو لواحد بسرعة مقارنة بالدول الأخرى، والشركات تما كيرحبو بالشيافر اللي حارفيين وعندهم الصبر ديال الطريق الدولية.
