25/04/2022
🔻 فولكس فاجن جيتا + باسات ( ٢٠٠٦ إلى ٢٠١١ ) .. الرشيقة وأختها الاكبر الفخامة كلها 😘😍
✴️ موديلين من أجمل وأشيك إبداعات شركة فولكس الحقيقة ... وشركة فولكس حققت مبيعات عالية وعملت شغل جامد خصوصا التطور اللي شد الناس سواء في التصميم أو الراحة أو الفخامة العالية وقتها ..
✅ الإثنين دول ألماني الاصل .. ومتصنعين في المكسيك
_______________________________________________________
🔹 الاثنين نزلوا بنفس الموتور سعة ٤ سلندر ١٦٠٠ CC تنفس طبيعي مع فتيس أوتوماتيك ٦ سرعات عادي واعتمادي ..
[ من موديل ٢٠٠٦ إلى النص الاولاني من ٢٠١٠ ]
▪️ و بعد النص الثاني ل ٢٠١٠ .. ابتدوا ينزلوهم بنفس الموتور بس بالفتيس دوال كلاتش / DSG مكون من ٧ سرعات ..
▪️ومع الاستخدام ظهر مشاكل الكلاتشات والميكاترونيك بتاع الفتيس .. كان بيسخن وبيضرب بسرعة خصوصاً في الصيف ..
▪️وناس كتير كانت بتنقل الفتيس على مانيوال في الزحمة .. علشان مينقلش بسرعة كتير والميكاترونيك ميسخنش ( الفتيس ده نقلاته سريعة جدا .. والموضوع ده في الزحمة كان صعب جدا مع كمبيوتر الفتيس وبيسخن وبيضرب في وقت قصير )
⛔ ملحوظة .. ناس كتير بعدت عن الموديل بتاع ٢٠١٠ لحااااد موديل ٢٠١٧ بسبب قصة الفتيس ديه وعدم اعتماديته ..
▪️لكن حاليا لو فكرت فيهم ( موديلات من ٢٠١٠ فأعلى ) بالفتيس ال DSG .. أنت ممكن تمشي بيه لغاية ما يجيب أخره .. وتروح تركب الفتيس DSG بتاع موديل ٢٠١٧ 👌🏻
الفتيس ده ممتاز ومشاكله قليلة جدا .. وهيديلك اداء رياضي ممتاز + توفير بنزين عالي جدا.
🔹 بتنزل بأنظمة أمان ممتازة سواء فرامل ( ABS , EBD , ESP , TC , BA ) وعدد من الايرباجات الكتير في الفئات العالية
_________________________________________________________
✅ مميزات الجيتا + الباسات :
▪️اعتماديين جدا جدا واعطالهم قليلة جدا
▪️مصاريفهم حالياً ممتازة كموتور وعفشة وصيانة عامة .. وحاجات كتير منهم رخيصة ومقبولة كأسعار
▪️استهلاك البنزين للفتيس الاوتوماتيك العادي ممتازة جدا ( متوسط ٨ لتر لكل ١٠٠ كم ..
▪️ ومع الفتيس DSG ممكن يوصل الاستهلاك ل ٦.٥ لتر وأقل كمان !!
⛔ ملحوظة .. الاستهلاك في الباسات أعلى شوية بسبب الحجم والوزن
▪️عضم العربية قوي والباب ثقيل ومحمل .. ودعامات فولاذية محاوطة العربية بالكامل وخلف الاكصدامات ..
ولو لا قدر الله خبطت عربية كوري أو ياباني .. ممكن تجيب ربع أمامي أو خلفي .. والاصابات عندك هتكون بسيطة جداً.
▪️مساحات داخلية مقبولة في الجيتا
▪️مساحات داخلية كبيرة وحلوة في الباسات
▪️الكراسي مريحة والخامات ممتازة
▪️صوت عزل الهواء والارضي ممتازين لحاد ١٣٠
▪️ركوبة وشياكة وفخامة .. خصوصا مع العدادات اللي لونها أزرق لحاد موديل ٢٠٠٩ .. وبعدها اتغيرت بالعدادات لونها أبيض
بس أنا شايف الازرق أشيك بكتيييييير وفخمة جدا
▪️السماعات والساوند سيستم خرافة .. والصب والبيز متوزعين بشكل فوق الممتاز 👌🏻
▪️اوبشنز كثير جدا ودلع .. خصوصاً في النسخة الخليجي ( بالفوانيس الزينون ) ..
▪️شنطة حلوة
▪️قطع غيار متوفرة وسعرها حلو
▪️ثبات عالي جدا في السرعات .. والعفشة مريحة والركوبة بصفة عامة ممتعة جدا وتحس دايما بالفخامة
▪️درسكيون كهرباء ناعم وتوجيه فوق الممتاز بيتقل مع السرعات
▪️تانك البنزين حجمه ٥٥ لتر .. وأحسن حاجة بتمشي بنزين ٩٢ بشكل ممتاز .. والتانك ده لو انت ماشي على ١٠٠ ل ١٢٠ ممكن يمشيك بتاع ١٠٠٠ كم مرتاح ( موفرة في السفر )
✅ إعادة البيع ممتازة حالياً لو الحالة نظيفة
_______________________________________________________
❌ عيوب الجيتا :
▪️ ( الخلوص الارضي منخفضة للأسف حوالي ١١.٢ سم ) على الرغم إنها مصفحة من تحت بس مش بتاعة مطبات اهالي غير آدمية ..
بس لو راكب ومعاك ٢ .. العربية مش بتحك في المطبات العادية بس محتاج تاخدها بهدوء وتحرص شوية.
▪️نقطة تانية .. التكييف ضعيف كان عايز يبقى أقوى من كده .. وانا في العربية اللي معاية موديل ٢٠٠٨ ركبت كمبريسور بتاع الاوكتافيا .. والتكييف بقى ثلاجة
▪️التسارع بطيء .. بطة بلدي في الطلعة بسبب الوزن .. ولو قرصت أو شديت بيها بتستجيب معاك بشكل مقبول .. لكن بصفة عامة التسارع عادي .. مش هتخنقك يعني
✓ وطبعا ده بسبب وزن العربية مقارنة بقوة الموتور اللي فيها .. الموتور كان محتاج يبقى أقوى من كده ..
⛔ ملحوظة .. الالماني لو حاجة باظت .. كمثال البطاحات .. وانت اخدت قرار تغيرها
فلو الصناعي قرر لقى حاجة بايظة أو نص نص وهو بيفك علشان يغيرلك البطاحة ... مينفعش يركبها تاني وبالتالي هيغيرلك اي حاجة بايظة طالما فك العفشة .. والعفشة عمومآ اعتمادية وقوية
________________________________________________________
❌ عيوب الباسات B6. :
▪️الموتور ال ١٦٠٠ ضعيف شوية على وزنها ولكن العزم كان ممتاز في العربيتين ومش بتتأثر بشكل كبير في السرعات فوق ال ١٢٠ او ١٣٠ فأعلى زي المنافسين من الكوري و الياباني ..
▪️التكييف برضه كان عايز يبقى أفضل من كده .. بس مقبول الحقيقة وممكن تركب كمبريسور اوكتافيا
▪️ استهلاك البنزين بتاعها عالي شوية في الزحمة لو بتجري بيها أو عايز اداء جري .. و ده بسبب وزنها و حجم الموتور الصغير .
______________________________________________________
🔺 من أحسن الحاجات في العربيتين دول .. إن معظم أصحابها بيهتموا بيها جدا كأنها بنتهم .. ودائما بيهتموا بالحالة العامة للعربية سواء الشكل الخارجي و الداخلي ..
💥 يا سلام لو ركبت سيستم ٢٠٠٠ CC .. العربتين بيقلبوا طيارة حرفياً ومتعة بلا حدود .. وفيه ورش كتير شاكرين في عائلة الفولكس دلوقتي وعندهم لعب للصبح
✅ عايز اقولكم .. أنا من الناس اللي كانت بتعشق العربيتين دول جدا .. خصوصا الجيتا حبيبة قلبي ( ليها معزة خاصة ).. معاية موديل ٢٠٠٨ .. ولحاد ال ١٠٠ ألف كم صيانات دورية فقط.
🔹 الحقيقة مستغرب من تصاميم فولكس للجيتا والباسات التقليدية اللي نزلت من ٢٠١٢ حتى ٢٠١٧ .. خصوصاً بعد الطفرة القوية اللي حصلت في الموديلات من ٢٠٠٦ ل ٢٠١١
⭐ لو لقيت حالة نضيفة وساكن بعدين عن مطبات الاهالي الغير ادمية .. العربيتين دول اختيار ممتع مع اعتمادية ممتازة بدون أعطال ، و قطع الغيار متوافرة و أسعار حلوة ،، و شياكة مش بتنتهي الحقيقة إطلاقا 👌🏻
#فولكس
#فاجن
#جيتا
#باسات
