27/12/2024
قانون فتح الاستيراد الشخصى
بصراحة، مكنتش عايز أتكلم عن الموضوع ده غير لما أفهم كل حاجة بالتفصيل وبعد ما فهمت الصورة كاملة، تعالوا نوضح كل حاجة:
1. حق استيراد السيارة
• كان الأول ليك الحق تستورد عربية كل سنة، لكن بعد التعديل الجديد بقى كل 5 سنين ليك الحق تستورد عربية سواء بنزين أو كهرباء.
2. إثبات الملاءة المالية
• بالبلدي كده، لازم يكون عندك حساب بنكي عليه حركة خلال آخر 6 شهور، ولو الحساب عليه حركة بـ20 ألف جنيه مش منطقي تروح تشتري عربية بـ2 أو 3 مليون جنيه.
• ده علشان يضمن إنك فعلاً قادر تشتري العربية دي بمبلغها الحقيقي، وده طبعًا هيزعل ناس كتير من التجار اللي كانوا بيجيبوا عربيات بأسماء موظفين شغالين عندهم. الموظف بياخد مصلحة والتاجر يبقى مبسوط، لكن النقطة دي كانت بتعتبر تجارة مش عادلة من وجهة نظر ناس تانية.
3. وقف الاستيراد وتبعاته
• في ناس شايفة إن وقف الاستيراد ظلم واحد كان حلمه إنه يستورد عربية لنفسه، وده من أبسط حقوقه.
• لكن الحسنة بتخص والسيئة بتعم، وده اللي خلّى القرار يغلق الاستيراد على الكل لضمان العدالة.
4. تحويل الفلوس واستيراد العربية
• الأول كان ممكن تتصل بقريب ليك في أي دولة يحول تمن العربية وتخلص. كمان في طرق تانية كانت بتستخدمها بعض التجار لإخراج الفلوس
• دلوقتي لازم تروح البنك وتودع الفلوس بالجنيه المصري، والبنك هو اللي هيحوّلها لبره. ويضمن العملية ودي ميزة فى عمليات نصب كتير كانت بتحصل
• لو معاك دولار وعايز تودعه، البنك مش هيقبله إلا لو عارف مصدر الفلوس دي.
5. نموذج 4 وأولوية الاستيراد
• النموذج 4 بيتعمل للسلع اللي قيمتها أكتر من 25 ألف دولار وفى ناس بتقول لاكثر من ٢٠٠٠ دولار دي محتاجة توضيح
• طيب لو أنا عايز أستورد عربية قيمتها أقل من 25 ألف دولار، ليه أدخل في نموذج 4 أصلاً؟ ده سؤال منطقي وبيتساءل كتير من الناس.
• كمان السؤال التاني: هل لو عملت النموذج ده هيبقى ليك الأولوية في استيراد عربيتك؟ ولا البنك هيقولك استنى لما نخلص استيراد السلع الأساسية زي الأرز واللحوم؟
وأخيرًا…
لحد اللحظة دي، ACID مازال مقفول على السيستم، ولم يتم فتح الاستيراد حتى الآن. بالتوفيق للجميع!
القرار ده من وجهة نظري ممتاز للوكلاء لأنه بيحافظ على حصتهم في السوق، لكنه مش هيعجب التجار اللي كانوا بيعتمدوا على استيراد السيارات بشكل غير مباشر لتحقيق مكاسب إضافية.
وفي النهاية، شكر كبير للدولة المصرية على القانون ده اللي هدفه الأساسي تحقيق العدالة وتنظيم السوق لصالح المواطن اللي نفسه يمتلك سياره
