10/08/2026
ناس كتير شافت فيديو الشاب اللي اتسحبت رخصته بسبب وجود كيسين فيهم بضاعة كان بينقلهم ضمن شغله.
وكان في تعليقات كتير "زي كيسين بضاعة… يسحبوا الرخصتين؟ آه يا بلد العجائب"
الحمد لله النهاية كانت سعيدة تدخل مسؤولين وتمت إعادة الرخصة للراجل تعاطفًا مع ظروفه.
لكن وسط كل التعاطف ده سواء مننا أو من المسؤولين، كان في سؤال أهم لازم نسأله:
هو القانون أصلًا كان في صفه… ولا ضده؟
الظابط قال إن من حقه سحب الرخص بسبب مخالفة استخدام المركبة في غير الغرض المبين بالرخصة.
والشاب، زي أغلب الناس، مكانش فاهم الكلام.
وهنا فرق مهم جدًا لازم نفهمه.
يعني لو أنت راكب عربيتك الملاكي واشتريت هدوم لأولادك، أو جبت حاجات الشهر، أو اشتريت أي حاجات للبيت، أو واخد معاك شنط فيها أي حاجة تخصك عشان مسافر .. إلخ، أكيد مفيش مشكلة طبعًا والقانون في صفك.
لكن لو العربية الملاكي بتستخدم في نقل بضائع ذات سمة تجارية، زي كميات واضحة إنها للبيع، أو طرود بأسماء مختلفة، أو بضاعة مرتبطة بنشاط تجاري… هنا الوضع بيختلف.
والموضوع مش مجرد مخالفة بسيطة.
العقوبة بتوصل لسحب الرخصتين رخصة القيادة ورخصة العربية!
وده معناه إن مخالفة بسيطة في شكلها ممكن تعمل لك مشكلة كبيرة جدًا في حياتك وشغلك.
فما تفترضش إن "دي عربيتي وأنا حر أحط فيها اللي أنا عايزه"
وطبعًا وضع البضاعة في شنطة العربية بدل الكنبة أو الكرسي اللي جنبك أكيد أرحم ومش مستفز زي ما تحطها جنبك أو على الكنبة، لكن ده مش ضمان إنك بعيد عن المخالفة لأن لا قدر الله لو تم تفتيش العربية واتضح إنك محمل بضاعة تجارية في عربية ملاكي هنرجع لنفس المشكلة.
عشان كده، الحل الأكثر أمانًا هو عدم استخدام العربية الملاكي في نقل البضائع التجارية ولو اضطريت يبقى لازم تبقى عارف إن القانون مش في صفك.
وهنا بنوصل لنقطة مهمة …
هل كل واحد بينقل كيسين بضاعة في عربيته هو "مخالف" يستحق أقصى تطبيق للعقوبة؟
فيه أصحاب مشروعات صغيرة بيبدأوا من الصفر، وفيه ناس بتشتغل طول اليوم، وفيه حد ممكن يكون عنده 10 أوردرات ومفيش إمكانيات يجيب عربية نقل كل مرة لأن تكلفة النقل بالنسبة له ممكن تكون ببساطة جزء كبير من مكسبه.
عشان كده نتمنى من المسؤولين إعادة النظر في التشريعات والمواد اللي ممكن تحط أصحاب المشروعات الصغيرة في موقف صعب بسبب طبيعة شغلهم لأن الناس دي بتوفر على الدولة إنها توفر لهم فرص عمل وبتقلل البطالة وفي الآخر هم شغالين بالحلال ونفسهم بس يكفوا احتياجاتهم واحتياجات أسرهم.
ولحد ده ما يتم، نتمنى من رجال المرور المحترمين مراعاة ظروف الناس قدر الإمكان وعدم التعامل مع كل الحالات بنفس المنطق وكأنها واحدة.
لأن في النهاية تطبيق القانون مهم، لكن الأهم إننا نلاقي توازن بين نصوص القانون وزي ما بيقولوا "روح القانون" وظروف الناس اللي بتجري على أكل عيشها.
وفي النهاية لازم كلنا كملاك عربيات نبقى عارفين طبيعة المخالفات وقوانين المرور المهمة المتعلقة بحياتنا لأن مدام معاك عربية فلازم تبقى عارف إمتى القانون بيكون في صفك وامتى بيكون مش معاك.
عشان كده لو في أي حد معاه عربية وشايف إنه هيستفيد من المعلومة دي شارك البوست معاه ومع كل أصحابك عشان توصل المعلومة الصح، يمكن تنقذ حد من مخالفة وسحب رخص.
