26/07/2026
تعالي اعرفك علي كام حاجه ليك وعليك وانت بتشتري عربيه مستعمله عشان متلبسش 😁
- طالما معندكش خبره في العربيات لازم تفحص العربيه في مكان مُتخصص .. واوعي تشتري عربيه مهما كان حالتها ممتازه ومهما كان صاحبها قعد يغنيلك فيها الا اما تفحصها الاول.
- العداد بيتلعب فيه وبيتغير عادي مهما كان نوع وموديل العربيه .. الماني ولا يباني ولا صيني .. العداد بيتلعب فيه عادي، المصريين مسابوش حاجه الحمد لله 😁 .. وخد الكبيره ، في بعض مراكز الصيانه مبتعرفش اصلاً ان العداد كان ملعوب فيه .. وعشان كده اشتري من حد ثقه او اشتري بالحاله بغض النظر عن العداد
- لما تشتري عربيه وتقرر تروح تفحصها اختار انت المكان اللي تفحص فيه ويفضل يكون قريب من مكان المعاينه .. متروحش لمكان البائع هو اللي يختاره، ويقولك اصله قريب وبتاع لأن غالباً متفق مع الشباب بتوع الفحص ومقفشهم فلوس 😁
- مستندات الملكيه اللي تخصك وانت بتشتري هي كالآتي
رخصه العربيه - التوكيل او العقد المسجل - شهاده المخالفات
اوعي تستلم حاجه وتسيب التانيه .. اوعي تستلم حاجتين وتسيب التالته
يعني لو قالك خد الرخصه والتوكيل وهجبلك شهاده المخالفات بعدين ارفض الاستلام لأن غالباً مش هيجيبلك حاجه وهتلبس في رقم محترم في المخالفات بعدين 😄
- يُفضل تعمل استعلام امني عن العربيه قبل ما تشتري
- البائع بيعمل التوكيل علي حسابه
لو انت بتشتري وعايز عقد مسجل بتعمله علي حسابك
- لا يوجد مقياس عام لتسعير المستعمل .. المستعمل بالحاله كل ما كانت حاله العربيه اقوي واحسن كل ما يتدفع فيها فلوس اكتر.
- مفيش ظابط ولا رابط في سوق المستعمل ومش هتعرف تاخد حقك بعد كده لو في مشكله .. الموضوع كله ثقه وحذر .. وتأكد من كل حاجه قبل دفع جنيه .. والقانون لا يحمي المغفلين.
- معارض المستعمل 70% منها فاتح كده بدون اوراق😄
- تاجر المستعمل المظبوط هو اللي بيشتري العربيه ويفنشها ويعرضها للبيع بدرجه 10 من 10
- مترغيش كتير في البيعه .. عاجباك نفذ ولو مش عاجباك متهريش عشان وقتك ووقت الناس.
- الافضل تشتري عربيه تكون مترخصه في نفس المحافظه اللي انت منها.
- علي عكس ما بيقول كل الناس بقي انك تشتري من المالك الاصلي .. لا الافضل تشتري من تاجر مش من زبون حتي لو كسبان فيها .. ده حقه انه يكسب
بس التاجر المحترم بيبقي كاشف وباصص عليها قبلك وفحصها وفاهم عنك .. فلما يبقي تاجر ثقه وتشتري منه هتشتري وانت مطمن.. المالك لو عربيته فيها مشكله غالباً مش هيقولك عليها وهيبقي عايز يخلص منها.
- لو بتبيع عربيتك المستعمله .. بالله عليك بلاش تفتح الانترنت وتشوف اخواتها بيتباعو بكام وتروح رازع سعر وخلاص بناءً علي اللي انت شوفته 😅
العربيه بيتم تقييمها بناءً علي حاجات كتير جداً ملهاش علاقه بالسيرش اللي انت عملته علي النت.
- لو القدر جابك انك عرفت معرض مستعمل محترم خليك معاه واشتري منه .. المعرض مضمون لانه فاتح في مكان معروف وهتعرف ترجعله لو حصلك مشكله انما لو هتشتري من مالك العربيه فغالباً هيقابلك في الشارع ولو واجهتك مشكله في العربيه فمش هتشوف وشه تاني.
