12/06/2022
من زمان مو بعيد كتير ،كان في ناس لما تسألهم كيفكم يجاوبك ماشي الحال
أيامها كانت البرادات مليانة بكل أنواع الجبنة والبيض والألبان والخضر والفواكه ...
كانت الفريزا متخومة بلحمة السمك والغنم والفراريج و متروسة بمونة الفول والبازيلا والفاصولية
كانت القطرميزات معباية بالزيتون والمكدوس والمعقود بكل أصنافه ...
كان زيت الزيتون بالتنكات والسمنة كمان .. حتى السمنة العربي كانت موجودة .
واي شي تطلبه تلاقيه متوفر_ببيت_المونة..
كنا نروح المشاوير على المطاعم والمنتزهات ونشوي اللحمة والفروج بالسيارين وكانت الكلفة بسيطة ومقدور عليها
*كل هالنعم وكل هالخيرات ونحن عم ندفش*
كانت كل هالنعم متوفرة ومألوفة لدرجة ماعاد حسينا فيها وماعاد قدرناها
نسينا نتحدث عن هالنعم متل ما أمرنا ربنا ونسينا نشكره على فضله وكرمه
لحتى ايجت الأزمة ... وصرنا بالحقيقة
عم ندفش على دور البنزين والمازوت ...
عم ندفش على دور الخبز وعلى البطاقات وعلى السرفيس والباصات ...
عم ندفش على جواز السفر
عم ندفش لندفع للكهربا وعم ندفش لنأمن متطلبات البيت..
حتى المغترب يلي مفتكرينوا العالم مبسوط ومرتاح بغربتوا اليوم عم يدفش ...
عم يدفش ذكريات حلوة مرت بالبلد مع أهله وصحابه ...
وذكريات مؤلمة قبل ما يسافر مرت معه ...
عم يدفش تعب الشغل متل خلية النحل ليلحق يصرف على بيتو وأهلو البعاد ..
عم يدفش خوفه على مستقبل ولاده وأحفاده وقلقه على دينه وعاداته على أصله وشهادة ميلاده ..
عم يدفش الدمعة يلي بتنزل لما بيتفرج على صور من بلاده ولما بيسمع أخبار عن أهله وولاده ...
يعني الكل_عم_يدفش
*والحل إنو نرجع للبداية وللأرض ونرجع نشكر الله...
بلكي إن شاء الله بيرجع الخير وبيخلص التعتير .
اللهم ردنا إليك رداً جميلاً.
