10/10/2026
والله العظيم، أسعار العربيات المستعملة على السوشيال ميديا بقت مالهاش أي علاقة بالواقع؛ لا في الأسعار، ولا حتى في الصور اللي بتتشاف، واللي كتير منها بيكون بعيد تمامًا عن حالة العربية الحقيقية!
إحنا حرفيًا في دوامة، كل واحد بيضحك على التاني، وده بقى واقع مؤسف جدًا. فين المصداقية؟ وفين الناس اللي بتتعامل من غير لف ودوران؟
للأسف، ناس كتير من أصحاب العربيات بقوا يحددوا أسعار عربياتهم بناءً على اللي بيشوفوه على السوشيال ميديا، وكأنها المرجع الحقيقي للسوق، وده من أهم الأسباب اللي خلت عربيات كتير أسعارها توصل لأرقام خيالية متستاهلهاش !
والأغرب من كده إن اللي بيشتري عربية بسعر مبالغ فيه، لما ييجي يبيعها، بيحط سعر أعلى أو على الأقل نفس السعر اللي اشتراها بيه، وكأنه لازم بيعاقب الناس علي اللي دفعه .
طيب، هو مين قال إن باقي الناس لازم تتحمل نتيجة قرارك؟! مين قال إن السوق كله لازم يدفع تمن إنك اشتريت بسعر مبالغ فيه؟ محدش ضربك على إيدك وقالك لازم تشتري بالسعر ده!
لكن، وبكل أمانة، الراجل ده ممكن يكون اشترى بالسعر ده فعلًا، لأنه شاف الأسعار المنتشرة على السوشيال ميديا واعتبرها مقياسًا حقيقيًا للسوق. وهنا بقى مربط الفرس!
المشكلة مش في شخص واحد، المشكلة في منظومة أسعار وهمية بتتكرر كل يوم، لحد ما الناس صدّقتها وبقت بتتعامل على أساسها، رغم إنها في أوقات كتير مالهاش أي علاقة بسعر البيع الحقيقي على أرض الواقع.
عتابنا مش على حد بعينه، لكن على حال سوق بقى صعب نفهمه، وعلى غياب المصداقية اللي خلّى المشتري خايف يشتري، والبائع مش عارف يبيع، والكل شايف نفسه صح!
يا جماعة، مش كل سعر مكتوب على الإنترنت يبقى سعر السوق، ومش كل عربية معروضة بسعر معين تبقى اتباعت بالسعر ده.
ارحموا بعض شوية، وخلي فيه مصداقية، لأن في النهاية إحنا مش بنضحك على بعض وبس، إحنا بنضيّع على بعض فرص البيع والشراء، وبنخلّي حاجة المفروض تسهّل حياتنا تبقى سبب في تعقيدها!
