06/08/2016
- هو ليه أحمد زويل خد جايزة نوبل ؟
- عشان إخترع الفيمتوثانية
- في الحقيقة لأ زويل مخدش جايزة نوبل في الكيمياء عشان "اخترع" الفيمتو ثانية .. الفيمتوثانية وحدة قياس , يعني مينفعش أقول فلان إخترع السنتيميتر , السنتيميتر طول عمره موجود احنا بس طورنا وسيله نقيسه بيها
- إمال هما كرموه ليه ؟
- هقولك أنا .. العلماء على مر تاريخ الكيمياء كان عندهم معرفه بالتفاعلات الكيميائية بس عمرهم معرفوا هي بتحصل إزاي , يعني هما كانوا عارفين انه لما تسخن الكربون الموجود في الخشب بالنار هيلقط ذرتين أوكسجين من الجو و يكون ثاني أكسيد الكربون , تخيل العملية انه العلماء كلهم قبل أحمد زويل كانوا بيبصوا على آلة غريبة بتحط فيها حديد من الناحية ده تطلعهولك أجهزة موبايل من الناحية التانية بس عمرهم ما فهموا الآلة ده بتعمل كده ازاي .
- إشمعنى ؟
- لأنه التفاعل الكيميائي بين المواد بيحصل في فيمتو من الثانية , بص احنا بنقسم الوقت بمعرفتنا الساعة فيها 60 دقيقة و الدقيقة فيها 60 ثانية .. خد الثانية قسمها مليار جزء و بعدين قسم كل جزء من المليار لمليون جزء .. و خد جزء من المليون الأخيره ده و بكده هيبقى عندك الفيمتوثانية , أهه في الفيمتو ثانية ده التفاعل الكيميائي كان بيحصل , و كان من المستحيل انه العلماء يعرفوا هو بيحصل ازاي لأنه بيحصل بسرعة شديدة جدا جدا مستحيل انهم يصوروها حتى بأعظم كاميرات التصوير , و هنا بقى جه دور أحمد زويل .. لما طور تقنية تصوير بتسمحله انه يصور التفاعل ده و هو بيحصل لأنه التقنية المستخدمة بتسمح ليهم بتسجيل التفاعل في صور متلاحقة بين الواحده و التانية فيمتو من الثانية , عشان أوضحلك عظمة التقنية ده تخيل انك في أوضه عتمه تماما و جبت بطيخة و حطيت قدامها كاميرا بتصور بالفيمتو من الثانية و فتحت النور في الأوضه , الكاميرا هيبقى عندها كذا صورة للبطيخه و هي مضلمه و بعدين النور هيبدأ يظهر في الصور و يغمر البطيخة من الناحية اللي هو جاي منها للناحية التانية .. بالنسبة لعينك الطبيعية الأوضه بتنور على طول لكن في الحقيقة النور بياخد فترة من الزمن لحد ما يسافر من مصدره للبطيخة الفترة ده بتقدر بفضل تقنية أحمد زويل انك تصورها و تتفرج عليها
طب تخيل انك ضربت رصاصة على البطيخة و صورتها بالكاميرا ده اللي بتبطئ الصورة لكل جزء من الفيمتو ثانية عارف هتقعد قد ايه تتفرج على الرصاصة و هي بتدخل و تطلع من البطيخة ده ؟ حوالي سنه او سنة و شوية بالنسبة لعينك الطبيعية الحدث بتاع الرصاصة بيحصل في وقت لا يذكر , بالنسبة للكاميرا اللي بتصور كل فيمتو من الثانية صورة هيبقى عندك عدد كوادريليون "واحد قدامه 15 صفر" صورة لكل ثانية طارت فيها الرصاصة لحد ما ضربت البطيخة ..
بالسرعة ده زويل وفر للعلماء تقنية يقدروا من خلالها انهم يصوروا التفاعلات الكيميائية و يعرفوا هي بتتكون ازاي و ده خلاهم قادرين على إعادة برمجتها و تغييرها و ساعدهم يصنعوا أدوية و مواد جديدة مفيدة للإنسان ,, زي ما ساعدهم على بناء تفاعلات جديدة بين مواد مختلفة .. العالم بقى عامل زي المايسترو اللي بيشغل السيمفونيات التفاعليه زي ما هو عاوزها
- الموضوع عاوزله خيال شوية
- لو لسه مفهمتش أنا هسيبلك شوية مصادر تفهم الموضوع بعمق أكتر .. يا ريت تبتدي بالفيديو
المصادر :
البحث الحائز على جائزة نوبل في الكيمياء :
www.zewail.caltech.edu/PhysToday.pdf
فيديو مترجم من TED بيشرح تقنية التصوير بالفيمتوثانية
http://www.ted.com/talks/ramesh_raskar_a_camera_that_takes_one_trillion_frames_per_second
موقع أحمد زويل
http://zewail.caltech.edu/nobel/index.html
موقع جائزة نوبل عن أحمد زويل
http://www.nobelprize.org/nobel_prizes/chemistry/laureates/1999/zewail-bio.html
الفيمتوثانية
http://en.wikipedia.org/wiki/Femtosecond
تطوير مهم من أحمد زويل لبحثه الأولي و تقنية التصوير 4D
http://rsta.royalsocietypublishing.org/content/368/1914/1191.abstract
موقع جيد مختص بتقنيات العلم شديد السرعة
http://ust.caltech.edu/
