13/10/2026
“ပျော်ရွှင်မှုကိုတောင် အဆင့်အတန်းရှိရှိ ရွေးချယ်တတ်ဖို့လိုတယ်”
🔳 လူတော်တော်များများက ပျော်ရွှင်မှုဆိုရင် ဘာပဲဖြစ်ဖြစ် ပျော်ရရင် ပြီးရော.. အားလုံးကောင်းတယ်လို့ ထင်တတ်ကြတယ်။ စိတ်ညစ်နေရတဲ့ဘဝမှာ ပျော်စရာတစ်ခုခုရရင် မကောင်းဘူးလားပေါ့။ အလုပ်ပင်ပန်းလို့ ပျော်ချင်တယ်။ လူတွေကြားမှာ စိတ်မောလို့ ပျော်ချင်တယ်။ ဘဝက ဖိအားများလို့ ပျော်ချင်တယ်။
ဒါပေမဲ့ မေးစရာတစ်ခုရှိတယ်။
ကိုယ်ရွေးနေတဲ့ပျော်ရွှင်မှုက ကိုယ့်ဘဝကို တကယ်အားဖြည့်ပေးနေတာလား။ ဒါမှမဟုတ် ခဏလေး စိတ်လွတ်အောင် လုပ်ပေးပြီး နောက်တစ်နေ့မှာ ကိုယ့်ကိုပိုပင်ပန်းစေနေတာလား။
🔳 ပျော်ရွှင်မှုတိုင်းက တူညီတဲ့အရည်အသွေး မရှိဘူး
တချို့ပျော်ရွှင်မှုတွေက လူကို ပေါ့ပါးစေတယ်။ တချို့ပျော်ရွှင်မှုတွေက လူကို ပိုလေးလံစေတယ်။ တချို့ပျော်ရွှင်မှုတွေက စိတ်ကို ကြည်စေတယ်။ တချို့ပျော်ရွှင်မှုတွေက စိတ်ကို နောက်ပိုင်းမှ ပိုရှုပ်စေတယ်။
ညနေအလုပ်ပြီးလို့ စာအုပ်လေးတစ်အုပ်ဖတ်တာလည်း ပျော်ရွှင်မှုပါ။ မိသားစုနဲ့ စကားအေးအေးဆေးဆေးပြောတာလည်း ပျော်ရွှင်မှုပါ။ ကိုယ့်ခန္ဓာကိုယ်ကို ဂရုစိုက်ပြီး လမ်းလျှောက်တာလည်း ပျော်ရွှင်မှုပါ။
တစ်ဖက်မှာတော့ မသိမသာ ကိုယ့်ရဲ့အချိန်တွေကို စုပ်သွားတဲ့ အပျင်းဖြေမှုတွေ၊ ကိုယ့်စိတ်ကို ညစ်ညူးစေတဲ့ စကားဝိုင်းတွေ၊ ကိုယ့်ကိုယ်ကိုယ် မကြိုက်အောင်၊ Self Respect ကျသွားအောင် ပြန်လုပ်မိစေတဲ့ ပျော်ရွှင်မှုတွေလည်း ရှိတယ်။
ပျော်တာချင်းတူပေမဲ့ နောက်ဆက်တွဲက မတူဘူး။ အဲဒီနေရာမှာပဲ လူတစ်ယောက်ရဲ့ဘဝအနှစ်သာရ၊ အတွေးအခေါ်၊ ဘဝအဆင့်အတန်းက စတင်ကွဲသွားတတ်တယ်။
🔳 အဆင့်အတန်းရှိတဲ့ပျော်ရွှင်မှုဆိုတာ ဈေးကြီးတာမဟုတ်ဘူး
အဆင့်အတန်းရှိရှိ ပျော်ရွှင်တယ်ဆိုတာ ဟိုတယ်ကြီးတွေသွားတာ၊ စားသောက်ဆိုင်ကောင်းကောင်းထိုင်တာ၊ ခရီးစဉ်ကြီးတွေသွားတာမျိုးကို မဆိုလိုပါဘူး။ အဲဒါတွေကလည်း တစ်ခါတလေ ပျော်ရွှင်မှုဖြစ်နိုင်ပါတယ်။ ဒါပေမဲ့ အဓိကက ဈေးနှုန်းမဟုတ်ဘူး။ ကိုယ့်စိတ်အရည်အသွေးပါ။
လက်ဖက်ရည်တစ်ခွက်ကိုတောင် စိတ်အေးအေးနဲ့ သောက်နိုင်တာက အဆင့်အတန်းရှိတဲ့ပျော်ရွှင်မှု ဖြစ်နိုင်တယ်။ မနက်ခင်းမှာ ဖုန်းမကိုင်ခင် ကိုယ့်စိတ်ကို ကိုယ်ပြန်စုစည်းနိုင်တာက အဆင့်အတန်းရှိတဲ့ပျော်ရွှင်မှု ဖြစ်နိုင်တယ်။
သူများအကြောင်းမကောင်းပြောတဲ့ဝိုင်းကနေ ထွက်လာပြီး ကိုယ့်အတွင်းစိတ်ကို သန့်သန့်ရှင်းရှင်းထားနိုင်တာကလည်း အဆင့်အတန်းရှိတဲ့ပျော်ရွှင်မှု ဖြစ်နိုင်တယ်။
တချို့ပျော်ရွှင်မှုတွေက ကိုယ့်ကိုယ်ကိုယ် လေးစားမှုတိုးစေတယ်။ တချို့ပျော်ရွှင်မှုတွေက ကိုယ့်ကိုယ်ကိုယ် မျက်နှာမဆိုင်ချင်အောင် လုပ်တတ်တယ်။ ဒါကြောင့် ပျော်ရွှင်မှုကိုရွေးတဲ့အခါ “ပျော်ရင်ပြီးတာပဲ” လို့ မစဉ်းစားသင့်ဘူး။ “ဒီပျော်ရွှင်မှုက ငါ့ကို ဘယ်လိုလူဖြစ်အောင် ပျိုးထောင်နေလဲ” လို့ စဉ်းစားတတ်ဖို့လိုတယ်။
🔳 ဗုဒ္ဓဘာသာအမြင်နဲ့ကြည့်ရင် ပျော်ရွှင်မှုမှာလည်း အမြင့်အနိမ့်ရှိတယ်
ဗုဒ္ဓဘာသာမှာ ပျော်ရွှင်မှုကို တစ်မျိုးတည်းအနေနဲ့ မမြင်ဘူး။ ကာမသုခလို အာရုံခံစားမှုအခြေခံတဲ့ ပျော်ရွှင်မှုရှိသလို၊ နေက္ခမ္မသုခလို စွန့်လွှတ်နိုင်ခြင်းကနေ ရတဲ့ ပျော်ရွှင်မှုလည်းရှိတယ်။
ဒါနလုပ်ပြီးရတဲ့ ပီတိ၊ သီလစောင့်ပြီးရတဲ့ စိတ်လုံခြုံမှု၊ ဘာဝနာကနေ ရတဲ့ ငြိမ်းချမ်းမှုတွေက ပိုနက်တဲ့ပျော်ရွှင်မှုတွေပါ။
အဓိပ္ပါယ်က လူဟာ မပျော်ရဘူးလို့ မဟုတ်ဘူး။ ပျော်ပါ။ ဒါပေမဲ့ ကိုယ့်ကိုချည်နှောင်သွားတဲ့ပျော်ရွှင်မှုနဲ့ ကိုယ့်ကိုလွတ်လပ်စေတဲ့ပျော်ရွှင်မှုကို ခွဲသိဖို့လိုတယ်။
တချို့ပျော်ရွှင်မှုတွေက ခဏလေးအတွက် စိတ်ကိုအရသာပေးတယ်။ ဒါပေမဲ့ နောက်ပိုင်းမှာ စွဲလမ်းမှု၊ မကျေနပ်မှု၊ နှိုင်းယှဉ်မှု၊ မနာလိုမှုတွေ ထပ်ထည့်ပေးတတ်တယ်။ တချို့ပျော်ရွှင်မှုတွေကတော့ ချက်ချင်းကြီး အလွန်အမင်းစိတ်လှုပ်ရှားစရာမကောင်းပေမဲ့ နောက်ပိုင်းမှာ ကိုယ့်ဘဝကို ပိုငြိမ်းချမ်းစေတယ်။
🔳 လူတစ်ယောက်ရဲ့အနာဂတ်ကို သူပျော်ရွှင်တဲ့အရာတွေကလည်း တည်ဆောက်နေတယ်
နေ့တိုင်း ကိုယ်ဘာနဲ့ပျော်နေသလဲဆိုတာ အရေးကြီးတယ်။ လူတစ်ယောက်က အမြဲတမ်း ညည်းညူတဲ့စကားဝိုင်းထဲမှာပဲ ပျော်နေတယ်ဆိုရင် သူ့စိတ်ကလည်း ညည်းညူတတ်တဲ့စိတ်ဖြစ်လာမယ်။ အမြဲတမ်း သူများကျရှုံးတာ၊ သူများအပူကို ကြည့်ပြီး ပျော်နေတယ်ဆိုရင် သူ့အတွင်းစိတ်မှာ အပူတွေပဲများလာမယ်။
လူတစ်ယောက်က လေ့လာခြင်းနဲ့ပျော်လာတယ်။ ကိုယ့်ကိုယ်ကိုယ် တိုးတက်အောင်လုပ်ခြင်းနဲ့ပျော်လာတယ်။ ကောင်းတဲ့လူတွေနဲ့ စကားပြောခြင်းနဲ့ပျော်လာတယ်။ တစ်နေ့တာကို သပ်သပ်ရပ်ရပ်ဖြတ်သန်းနိုင်ခြင်းနဲ့ပျော်လာတယ်ဆိုရင် သူ့ဘဝက တဖြည်းဖြည်း အခြားအဆင့်ကို ရောက်လာတတ်တယ်။
🔳 အရွယ်တစ်ခုရောက်လာရင် လူဟာ ပျော်ရွှင်မှုကိုလည်း စိစစ်ရွေးချယ်တတ်လာရတယ်။ အဲဒီပျော်ရွှင်မှုက ကိုယ့်ကို ပိုကြည်လင်စေသလား။ ပိုတည်ငြိမ်စေသလား။ ပိုကျယ်ပြန့်စေသလား။ ပိုသန့်ရှင်းစေသလား။ မဟုတ်ရင် အဲဒါက ပျော်ရွှင်မှုလိုပုံဖော်ထားတဲ့ စိတ်ပင်ပန်းမှုတစ်မျိုးပဲ ဖြစ်နိုင်တယ်။
လူတစ်ယောက်ရဲ့ဘဝအဆင့်အတန်းဆိုတာ သူပိုင်တဲ့ပစ္စည်းတွေကပဲ ပြောတာမဟုတ်ဘူး။ သူဘာနဲ့ပျော်တတ်သလဲဆိုတာကလည်း ပြောတယ်။ ပျော်ရွှင်မှုကို ရွေးချယ်တတ်တဲ့အခါ ကိုယ့်ဘဝကိုလည်း ရွေးချယ်နေခြင်းပါပဲ။
ဒါကြောင့် ပျော်ပါ။ ဒါပေမဲ့ ကိုယ့်ကို ယိုယွင်းသွားစေမယ့် ပျော်ရွှင်မှုမျိုးနဲ့ မပျော်ပါနဲ့။ ကိုယ့်ကို ပိုလွတ်လပ်လာစေမယ့် ပျော်ရွှင်မှု၊ ကိုယ့်စိတ်ကိုပိုကြည်လာစေတဲ့ပျော်ရွှင်မှု၊ ကိုယ့်ဘဝကို ပိုတန်ဖိုးရှိလာစေတဲ့ပျော်ရွှင်မှုကိုသာ ရွေးချယ်လိုက်ပါ။
#ဉာဏ
June, 9, 2026
ဆရာမဉာဏ၏စာအုပ်များကို City Mart စင်တာများနဲ့ အမြို့မြို့အနယ်နယ် စာအုပ်ဆိုင်များမှာ ဝယ်ယူရရှိနိုင်ပါတယ်။ Online က မှာယူလိုပါလျှင် Page Messenger ကနေ လာရောက်မှာယူနိုင်ပါတယ်။
