18/06/2018
اخيرا تم الكشف الرسمي على الBMW Serie 8 2019 الجديدة كليا 😍
اجي نعرفو طراز " الفئة الثامنة " : اول مره بان ف اواخر 1989 كموديل ل1990 و ستامر تال 1999 يعني 10 سنوات، ولكن هنا تم إقاف هاد الفئة بشكل نهائي بعد ما تباعت 30 الف و 621 سيارة منها.
و قررات شركة الBMW تعاود تحيي هاد الفئة مره اخرى ليوم ف 2018، و تخرج الجيل الثاني و الجديد كليا من الفئة الثامنة بشكل أكثر من جذاب بملامح مشدودة و حادة كاتعطيها شكل مهيييييب كيف كانقولو، و السبب هو منافسة المرسيدس S Coupe اللي تربعات على عرش سيارات الكوبي الفخمة و دمرات الفئة السادسة اللي وقفاتها الBMW بشكل نهائي مره آخرى (الكوبي فقط أما الغران كوبي السيدان ماكاينش قرار أكيد)، فخلا الBMW تفكر باش ترجع لهاد الفئة حيت تا عملائها مشاو للمرسيدس.
إذا Serie 8 2019 الجديدة بانت ب نسختين :
* الأولى (Essence) : الM850i xDrive ب محرك V8 سعة 4.4 لتر biturbo بقوة 530 حصان لي كاتخليها تتسارع من 0-100 كم/ساعة ب وزنها 1830 كلغ بالدفع الرباعي ف غضون 3.8 ثواني فقط.
* الثانية : ال840d xDrive ديزل و هي نسخة فخمة ماشي رياضية بحال الأولى (ماكاينش حرف الM) ب محرك 6 سيلاندر بقوة 320 حصان.
ولكن نسخة الإم باور لي غادي تحمل إسم M8 باقا ماخرجاتش، ولكن غادي توفر بمحرك V8 بقوة 650 حصان تقريبا.
أما بالنسبة لمحرك الV12 ماغاديش يكون ف هاد السيارة بشكل نهائي.
أما بالنسبة ل رأينا الشخصي....السيارة جدا جذابة و منافس قوي للمنافسة ديالها الإس كلاس كوبي خصوصا ف جانبي المرحكات حيت كاتوفر ب مرحك ديزل عكس الإس كوبي و السعر بحيت أن سعرها كايبدا من 100 مليون تال 125 مليون أما الإس كوبي كايبدا من 117 تقريبا...و حتى الأنظمة و التيكنولوجيا لي فيها جدا متطوره مابخلوش عليها ب شي نظام موجود ف الشركة.
ولكن بكل صراحة لحد الآن كانشوفها غير قادرة على أنها تنافس بالشكل المطلوب ف هاد الفئة ديال " سيارات الكوبي الفخمة " بحال الإس كوبي، كانشوفها رياضية كثر ما هي فخمة حيت للأسف المقصورة كيف المعتاد عادية جدا ((( "مقارنة" مع الإس كوبي و الرولز رايس رايث... لي مسيطرين على هاد الفئة ب كمية الفخامة و الرفاهية الي فيهم، واخا الإس نسخة الAMG وفخمة))) عكس الفئة الثامنة فهي ك شكل خارجي و محركات و أنظمة و سعر تنافس ولكن ك فخامة و دقة التفاصيل للأسف لا !!
و نتوما شنو رأيكم ؟
