18/02/2024
طريقة التعامل مع الشرطة أو الدرك الملكي
:هادي بعض الأمور القانونية البسيطة اللي تحتاجها فحياتك للتعامل مع البوليس خصوصا فهاد البلاد السعيدة :
1 ـ فحالة إلى جاو البوليس للدار و قالولك بغينا نقلبو شنو كاين الداخل , ما تكونش مكلخ و تبدا عليهم مرحبا أ شاف زيد أ شاف و الله ما كاين والو أ شاف .. وقف ليه فالباب و طلب منو أمر التفتيش هو اللول حتى تشوف الطلب بعينيك مزيان و راه خاص يدخلو بالرضا ديالك هادي لولا , ثانيا شوف الوقت اللي جاو فيه يقلبو المنزل لأنه القانون كايمنعهم يدخلو يقلبو المنزل من مور التاسعة ليلا إلى السادسة صباحا إلا في بعض الإستثناءات , ثالثا إلى كنتي غي ضيف و مول الدار كان خرج يقضي شي غرض و يرجع فراه ممنوع قانونيا عليهم يدخلو يقلبو وخا عندهم أمر التفتيش حتى يجي مول الدار و يدخلهم , لذلك وقف ليهم فالباب و قوليهم ينتاظرو مول الدار حتى يجي .
2 ـ فحالة إلى شدوك البوليس شي نهار بشي تهمة اللي نتا مادايرهاش , بلا ما تبقى ترجف و تبكي عليهم تما و تبقى تغني داك الموال ديال ياك أ شاف و الله أ شاف مادرت والو لميمة أ شاف , جمع راسك و سير معاهم راجل , و خليهم يديرو خدمتهم و لكن ما تكونش مكلخ , إلى عطاوك شي ورقة توقع عليها قراها مزيان على خاطرك و ماتخليهمش يزربو عليك , قراها بلاتي عليك لأنه ممكن تعترف بحاجة نتا مادايرهاش بمجرد التوقيع , و إلى لقيتي شي حاجة ماشي هاديك هي بلا ماتوقع ليهم و راه عندك الحق تدعيهم فيما بعد بتلفيق لك ديك التهم .
3 ـ راه قانونيا ممنوع عليهم يعذبوك باش تعتارف بشي تهمة نتا ما دايرهاش و إلى عذبوك راه من حقك ترفع عليهم دعوى قضائية من بعد إطلاق سراحك و ثبوت براءتك , لذلك ماتمسكنش عليهم راه كايزربو على الجاهل .
4 ـ فحالة إلى حطوك تحت الحراسة النظرية فمن حقك قانونيا أنك تطلب الإتصال بمحامي و ضابط الشرطة القضائية ممنوع عليه يرفضلك هاد الطلب لأنه حق قانوني فرضاتو القوانين الدولية , إلا أنه في المغرب في أغلب الأحيان حتى كاتفوت نصف المدة من الوضع تحت الحراسة النظرية ( بعد مرور 12 ساعة ) عاد كايعطيوك حق الإتصال بالمحامي و هاد القضية ماعجبتش منظمة حقوق الإنسان اللي كاتقر بأنه بمجرد اللحظة الأولى اللي يتم وضع المتهم فيها فكايكون عندو حق الإتصال ( هاد القضية كاتخدم بها الدول المتقدمة ),
5 ـ أخيرا يا صديقي مين يوقف عليك شي بوليسي رفع راسك و هدر معاه بصفته موظف لا أقل و لا أكثر و بلا ما تبقى تكبر ليه الشأن بداك الموال ديال الشاف و تتمسكن و تطيح بالقيمة ديالك راه هادا هو السبب باش البوليسي كايطغى على المواطن الجاهل , و إلى ضربك أو إعتدى عليك سير دعيه بلا ما تخدم ديك الفكرة ديال راه ماخاتخد منو والو ( أكبر كابوس عند الشرطي هو ترفع عليه دعوى إعتداء أو تسلط لأنه كايكون مهدد باش تمشيلو الوظيفة ديالو لأنه هاد الميدان صارم و التسامح فيه قليل بزااااف ).
6- من حقك تطلب الاسم أو رقم الشارة ديالو و مني تايشوفك طلبتيها خصوصا رقم الشارة تايتزرا تايخاف على راسو و ماتايفوتش معك القانون.. هادشي الا كان ظالمك ولا فات معك الحدود
هادو معلومات بساط بزاااف ماشي شي حاجة و لكن الكثير فهاد البلاد ماكايعرفوش يتعاملو مع هاد الأمور و كن متأكد أنه الإنسان الواعي قانونيا كايخافو من ردة الفعل ديالو عكس الجاهل المحبب عندهم بكثرة.
تحياتي لرجال الأمن الشرفاء.
تقديم : ACHRAF LAMIME
AuTo école Lahsini
