10/08/2026
Breaking News: මත්ද්රව්ය ජාවාරම්කරුවන්ට මරණ දඬුවම ලබාදීම සහ නීති දැඩි කිරීම ගැන ජනපති ප්රධානත්වයෙන් විශේෂ සාකච්ඡාවක්🔥
මත්ද්රව්ය සම්බන්ධ අපරාධ සඳහා මරණ දඬුවම ලබා දීම කෙරෙහි සභාවේ අවධානය
විෂ මත්ද්රව්ය උවදුර මේ වන විට කුඩා පුද්ගල සම්බන්ධතාවලින් ඔබ්බට යමින් සමස්ත ආර්ථික සහ සමාජ දේහයම බරපතල තර්ජනයකට ලක් කර තිබීමත්, ඉන් නොහැවතී එම තත්ත්වය වර්ධනය වෙමින් තිබීමත් පිළිබඳව අවධානය යොමු කරමින් මත්ද්රව්ය සම්බන්ධ අපරාධ සඳහා මරණ දඬුවම ලබා දීම කෙරෙහි “රටම එකට” ජාතික මෙහෙයුම් සභාවේදී අවධානය යොමු විය.
රටම එකට” ජාතික මෙහෙයුම් සභාව අද (10) පෙරවරුවේ ජනාධිපති කාර්යාලයේදී ජනාධිපති අනුර කුමාර දිසානායක මහතාගේ ප්රධානත්වයෙන් රැස් වූ අවස්ථාවේදී මේ පිළිබඳ සාකච්ඡාවට ලක් විය.
මත්ද්රව්ය ජාවාරමෙන් උපයා ගන්නා අසීමිත ධනය ආශ්රිතව ගොඩනැගී ඇති අපරාධමය පරිසරය මේ වන විට ජාතික ආර්ථිකයට, සංචාරක කර්මාන්තයට සහ සමාජ ආචාරධර්ම පද්ධතියට විශාල තර්ජනයක් ඇති බවත්, මත්ද්රව්ය ජාවාරම සහ අපරාධ පිළිබඳව බිය වන සමාජයක් ගොඩනැගීම වෙනුවෙන් දැඩි නීතිරීති ක්රියාත්මක කිරීමේ අවශ්යතාවත් “රටම එකට” ජාතික මෙහෙයුම් සභාවේ සාකච්ඡාවට ලක් විය.
සමස්ත සමාජ දේහයම බිඳ දමමින්, රටේ අනාගත පරපුර ගොදුරු කර ගනිමින් සිටින විෂ මත්ද්රව්ය ව්යසනය මුලිනුපුටා දැමීම වෙනුවෙන් රට තුළ ප්රායෝගික ක්රියාකාරීත්වයක් සහ කඩිනම් මතවාදී පරිවර්තනයක් ඇති කිරීමේ අවශ්යතාව මෙහිදී පෙන්වා දුන් ජනාධිපතිවරයා ඒ සඳහා ආගමික නායකයින්, දෙමාපියන් සහ ප්රජා සංවිධානවල සක්රීය දායකත්වය රජය අපේක්ෂා කරන බවද සඳහන් කළේය.
මෙම ජාතික ව්යසනයේ ගැඹුර අවබෝධ කර ගනිමින් ආයතනික පද්ධතිය තුළ සිදු කළ යුතු පරිවර්තනය පිළිබඳව මෙහිදී පුළුල් ලෙස සාකච්ඡා කෙරිණි.
මත්ද්රව්ය ජාලගත සහ ඇප ලබා දීමේ ක්රියාවලියට අදාළ නීති සංශෝධන දැනටමත් සකස් කර අවසන් අඩියේම පවතින අතර, එය කඩිනමින් ගැසට් කර පාර්ලිමේන්තුවට ඉදිරිපත් කිරීමට නියමිත බවද සඳහන් කෙරිණි.
මත්ද්රව්ය නඩු ප්රමාද වීමට හේතු වූ රසා පරීක්ෂණ වාර්තා නිකුත් කිරීමේ ක්රියාවලිය සැලකිය යුතු ලෙස වේගවත් කර තිබෙන බවත්, පසුගිය ජුලි මාසයේදී පමණක් රසා පරීක්ෂණ වාර්තා 6,414ක් නිකුත් කර තිබෙන බවත් සඳහන් කෙරිණි.
රසා පරීක්ෂණ වාර්තා ප්රමාදය නිසා බන්ධනාගාරගත වී සිටින පිරිස්වලට අදාළ නීතිමය කටයුතු කඩිනම් කිරීම වෙනුවෙන්, අත්අඩංගුවට ගත් මත්ද්රව්ය ප්රමාණය අනුව (ග්රෑම් 50 අඩු, 100 අඩු ආදී වශයෙන්) නීතිමය මට්ටම් මත පදනම් වූ වර්ගීකරණයක් ඉදිරිපත් කරන ලෙසත්, රසා පරීක්ෂණ දෙපාර්තමේන්තුව, පොලිසිය සහ බන්ධනාගාරය අතර මනා සම්බන්ධීකරණයක් ඇති කර, වාර්තා ලැබුණු සැනින් සැකකරුවන් අධිකරණයට ඉදිරිපත් කිරීම පිණිස විධිමත් ක්රියාවලියක් සකස් කරන ලෙසත් ජනාධිපතිවරයා උපදෙස් දුන්නේය.
