Car House

30/08/2024

صور لعربية قبل وبعد الحادثة
تم الانتهاء بعد ٢٠ يوم عمل
لم يتم استبدال اي قطع غيار
فقط تم استبدال الكشاف والاكصدام

25/07/2024

رأي بعض العملاء
جزيل الشكر للتقدير
هدفنا تقديم خدمة مميزة
شكر خاص للأستاذ/ وليد طاهر

14/01/2021

#هام
يعني ايه مبادرة احلال السيارات.. (شرح بسيط هيفيدك )

محتاج بس اعرفك في الأول إنه في حالة الملاكي، فانت ليك حرية الاختيار تمامًا تدخل عربيتك (إللي موديلها قبل سنة 2000) مشروع التخريد والاحلال أو لا.. مش جبر عليك نهائي إنك تدخلها تخريد، بس هيبقى إجبار عليك تركب الغاز الطبيعي وإللي الحكومة بتقسطه بدون مقدم بردو.. (حوالي 9000 تكلفته على 10 سنين تضاف قيمته على كل مرة تفول الأنبوبة.. رينچ 5 ل10 جنية في المرة)

- طيب ليه ضروري تركب غاز لو عربيتك عدى عليها 20 سنة! لإنه هيطلع قانون ممنوع ترخيص أي عربية قديمة غير عاملة بالغاز (معرفش ينطبق ع الجديد أو لا).. يعني هتروح تجدد رخصتك وتفحص، مش هيلاقي غاز، هيقولك أسف ملكش ترخيص عندي.

بعد 3 سنين بتوع مبادرة الإحلال والتخريد، مش هيرخصولك عربيتك لو قبل موديل 2000 :"| غير لو ركبت غاز
.................
- بخصوص الاستبدال بقى..

الوزيرة قالتلك إنه كل العربيات القديمة دي (عدى عليها اكتر من 20 سنة) هتتخرد في مقابل من 12 لـ20 ألف جنية ثابت لكل الأنواع.. حتى لو عربيتك تمنها 100 ألف، معلش هو دا التمن إللي هندفعهولك في مقابلها، والموضوع اختياري لو مش عاجبك السعر..

طب يعوضك إزاي عن السعر القليل دا! قالتلك هنعمل دعم ليك إسمه الحافز الأخضر.
على حسب موديل العربية إللي انت هتختاره، هنديك دعم بداية من 45 لـ75 ألف جنية يُخصم من تمن العربية كنوع من التعويض. (للي عربيتهم هتتخرد بس)
...................
_ إيه الموديلات المتاحة طيب!

شيفرولية اوبترا.. لادا جرانتا (مانيوال واتوماتيك).. بي واي دي f3.. سوزوكي ألتو.... هيونداي ألنترا hd.. هيونداي أكسنت rb.. نيسان صاني..... نيسان سنترا.. وكام موديل تاني صيني..

كل الموديلات إللي فوق دي بتاع السنة 2021 وبيتم إضافة موديلات جديدة باستمرار لإنه الحكومة متعاقدة مع حوالي 30 شركة مُصنعة في المرحلة الاولي بتقفل محلي هنا، وكل العربيات جاية بتعمل بالغاز وبموافقة الشركة الأم والمصانع بتاعها (يعني مفيش فيها ضرر عالموتور) وهتاخد العربية مترخصة كمان 3 سنين ومش مُضاف عليها سعر الغاز.
...............................
_نقول سعر العربيات كام أو قد إيه!

خليني الأول أقولك إنه الحكومة لغت الضريبة الجمركية عالعربيات دي إللي ضمن المبادرة، كمان لغت ضريبة القيمة المضافة ومفيش مصاريف إدارية.. هي راحت للمصنع قالتله أنا هاخد منك وليكن من الموديل الفلاني 10 آلاف عربية، فأكيد مش هاخدها بسعر العادي، بالإضافة للخصومات إللي عملتهالك فوق دي وفوقهم كمان تمن التخريد إللي هيبقى مُقدم وعليه الحافز الأخضر..

_نقول إيه هيحدد مين ياخد ال45 ومين ياخد ال75!

قالك على حسب الموديل ونوع العربية إللي انت هتاخدها.. يعني إللي هيختار عربية ب200 ألف، مش زي اللي هيختار عربية ب150.. كل واحد منهم هياخد دعم مختلف عن التاني والأكبر أكيد للسيارة الاغلى.

_يبقي تمن العربيات كام؟ زي السوق!؟

هو الأكيد لأ طبعًا أرخص.. الناس في المعرض كانوا بيسألوا مندوبين الشركات، مكنش عندهم علم أصلا بالتمن هيبقى كام فكانوا بيقولولهم السعر الرسمي، لكن سعر العربية إللي الناس هتشتري على أساسه، أقل طبعًا وبمبلغ محترم مش 5000.. ولسه قالوا بعد المعرض هيقولوا كل السيارات المتاحة وتمن كل واحدة منهم.

بس كده كده، انت معاك مقدم من 57 لـ 95 ألف تمن التخريد ودعم الحافز الأخضر من الحكومة..
..............................

_نقول نظام الاقساط إيه والبنوك!

البنك المركزي منزل منشور مباشر بيقولك 9 بنوك ضمن المبادرة بتقدم أفضل أنواع التسهيلات الممكنة للي في المبادرة، بداية من قيمة الفايدة إللي لا تزيد عن 3٪ حسب البنك، وكذلك دعم الحافز الأخضر، لكن مجاش لسه منشور مباشر للبنوك بالتفاصيل إللي هيبدأوا يتعاملوا بيها.. يقال مش هيبقى في ضمان الوديعة أو مفردات المرتب لإنه مش كل أصحاب السيارات القديمة موظفين او بيمتلكوا ودايع، بس لسه مفيش حاجة قديمة.. هنعرف التفاصيل دي في ظرف أسبوع.
.....................

المبادرة ممتازه جدا والتسهيلات تستاهل فعلا وكبيرة.. المستفيدين منها أصحاب السيارت القديمة فقط ولما حد سئل الوزيرة عاللي معندوش وحابب يشتري تبع المبادرة، قالت هنبقى نعرض الموضوع دا بعدين، لكن المستفيد حاليًا هما أصحاب السيارات إللي عدى على صنعها اكتر من 20 سنة.

سمعت إنه في شرط تكون عربيته من فترة، مش شاريها إمبارح وداخل بيها النهاردة، لكن مفيش تأكيد عالشرط دا لسه.. لسه بقولك اهو..

----------

كانوا مخصصين المرحلة الأولى لمحافظات بعينها، لكن خلوها كل المحافظات وعملوا موقع خاص تسجل عليه وتقدم ع الإنترنت لكن كنصيحة شخصية.. بلاش دلوقت استنى شوية على ما كل حاجة توضح، بداية من كل الموديلات لتعاملات البنوك والأسعار وغيره.

المفروض هتروح بعربيتك في طريق إسكندرية الصحراوي تتثمن وتتخرد وتاخد اذن تخريد ترجع بيه للبنك وتجيب ورقك وغيره عشان تتفق عالقسط مع الموديل اللي اخترته والتسليم والحاجات دي، لكن مش وقتها.. هبقى اقولك وقتها بالتفصيل.

تفاصيل البنوك هبقى احكيهالك بالتفصيل بردو لما تنزل.. بس أهم حاجة تكون بين 21 و55 سنة.. رخصة عربية سارية بأسمك..

25/10/2020

23/04/2020

كل سنة و انتم طيبين

28/02/2020

عامل مغسلة سيارت

22/02/2020