20/12/2022
«Ես տեսա հոգով ազատը ստրկության մեջ և սիրեցի մարդուն: Ես տեսա ստրուկն ազատության մեջ և գարշեցի մարդուց». Գարեգին Նժդեհ
Այսօր տոնվում է Հայաստանի նորանկախ՝ 31-ամյա պետության, ազգային անվտանգության ծառայության 104 ամյակը:
Ի՞նչ է սա նշանակում:
Փաստորեն, մեր անվտանգության ծառայության մերը լինելու փաստը, նաև եղել է ԽՍՀՄ բռնապետության ժամանակաշրջանում:
Մեր պետությունն այսօր տոնում է նախկին և ներկա КГБ-ի օրը: Այսօր մեր երկիրը տոնում է մեր անկախությունը զավթած և մեր հողերը յուրացրած ու թշնամուն նվիրած կայսրության անվտանգության կառույցի օրը: Այսօր հայ ժողովուրդը տոնում և մեծարում է Չարենց, Բակունց, Նժդեհ, Զատիկյան, Գորգիսյան և շատ այլ մեծանուն հայորդիներին հալածող և սպանող կառույցի օրը: Այսօր փառավորվում է այն կառույցը, որի մութ և դաժան բանտերում հալածվել են հազարավոր մարդիկ, ովքեր գլուխ են բարձրացրել սեփական հայրենիքի անկախության և սեփական ժողովրդի ազատության համար (խոսքս վերաբերում է ԽՍՀՄ բոլոր ժողովուրդներին):
Տոնելով և փառաբանելով КГБ-ի օրը, այլ ոչ թե ՀՀ ԱԱԾ-ի օրը, դու՛ք, Հայաստանը դարձնում եք թշնամի աշխարհի բոլոր ժողովուրդների և երկրների համար, ովքեր ԽՍՀՄ-ն ընդունել են որպես չարիքի կայսրություն, և ուժ ու եռանդ չեն խնայել պայքարելու այդ միության դեմ, հաղթելու և անկախություն տալու բոլոր գաղութացված հանրապետություններին:
Հ.Գ. Եթե որևէ մեկը կասի, թե ռուսական КГБ-ն այժմ որևէ կապ չունի ՀՀ ԱԱԾ-ի հետ՝ միանգամից պատասխանեմ.
- Ապա ինչու՞ եք տոնում ՀՀ ԱԱԾ 104-ամյակը և ինչու՞ հենց դեկտեմբերի 20-ին, որը Ռուսաստանում տոնվում է որպես «չեկիստի օր» (День работника органов безопасности (День чекиста)), եթե մեր պետությունը ընդամենը 31 տարեկան է, մեր Բանակը՝ նույնպես …
Ազա՛տ, անկա՛խ Հայաստան:
